DÇ-2026 zamanı "Instagram"da ən çox izləyici toplayan futbolçular məlum oldu

Futbol üzrə dünya çempionatı (DÇ-2026) müddətində "Instagram" sosial şəbəkəsində ən çox yeni abunəçi qazanan futbolçuların siyahısı bəlli olub. Oxu.Az xəbər verir ki, bu barədə "Sportico" portalı məlumat yayıb. Sıralamada ilk yeri norveçli futbol ulduzu Erlinq Holand tutur. 1. Erlinq Holand (Norveç) - 32.1 milyon izləyici artımı Norveçli hücumçu auditoriya artımına görə mütləq rekorda imza atıb. Turnirin 39 günü ərzində onun səhifəsini izləyənlərin sayı 40.6 milyondan 72.7 milyon nəfərə yüksəlib. Altı oyunda vurulan yeddi qol və Norveç tarixində ilk dəfə 1/4 finala vəsiqə qazanmaq bu uğurun yalnız bir hissəsidir. Əsas ajiotaj onun sosial şəbəkələrdəki fəallığı ilə bağlı olub. 2. Vozinya (Kabo-Verde) - 29.4 milyon Turnirin ən böyük kəşfi Kabo-Verde yığmasının qapıçısı Vozinya olub. O, azarkeşlərin yaddaşında etdiyi möhtəşəm qurtarışlarla qalıb. Təkcə qrup mərhələsinin ilk turunda DÇ-2026-nın qalibi İspaniya ilə matçda o, millisini yeddi dəfə real qoldan xilas edib və görüşün ən yaxşı oyunçusu seçilib. Mundiala cəmi 30 min izləyici ilə yollanan qapıçıya ispanlarla oyundan dərhal sonra 5 milyondan çox insan abunə olub. Turnir ərzində isə onun auditoriyası, demək olar ki, 30 milyona çatıb. 3. Cud Bellinqem (İngiltərə) - 12 milyon İngiltərə yığmasının yarımmüdafiəçisi və dünya çempionatının bürünc mükafatçısı izləyici artımına görə üçüncü pillədə qərarlaşıb. Onun abunəçi sayı 41.3 milyondan 53.3 milyon nəfərə qədər çoxalıb. Bellinqem İngiltərə komandasının əsas liderlərindən birinə çevrilərək, turnirin bombardirləri siyahısında yeddi qolla üçüncü yeri tutub. Onun iştirakı ilə olan videolar sosial şəbəkələrdə milyonlarla baxış toplayır. Azarkeşlər həmçinin onun yaşıl meydandakı emosional reaksiyalarını da xüsusi vurğulayırlar. Turnir ərzində abunəçi sayında ən yüksək artım müşahidə olunan on futbolçunun siyahısına aşağıdakılar da daxildirlər: 4. Kriştianu Ronaldu (Portuqaliya) - 11.4 milyon; 5. Lamin Yamal (İspaniya) - 11 milyon; 6. Neymar (Braziliya) - 7.7 milyon; 7. Lionel Messi (Argentina) - 7.5 milyon; 8. Xilberto Mora (Meksika) - 6.6 milyon; 9. Maykl Olise (Fransa) - 5.7 milyon; 10. Endrik Felipe (Braziliya) - 5.6 milyon.