Qaynar qəhvə içməyi sevənlərə xəbərdarlıq

"Qaynar qəhvə və digər çox isti içkilərin qəbulu qida borusu xərçəngi riskini artıra bilər". Oxu.Az xəbər verir ki, bu barədə qastroenteroloq Şripati Ketu "Everyday Health" jurnalına müsahibəsində danışıb. Şripati Ketu çox isti qəhvə içənlərə xəbərdarlıq edib. Həkimin sözlərinə görə, ağız, boğaz və qida borusunun selikli qişalarında termik zədələnmə içkinin temperaturu təxminən 60 dərəcəyə çatdıqda belə baş verə bilər. "Yanıq yanma və ya sancma hissi, selikli qişanın qızarması, suluqlanması və ya soyulması, eləcə də udma zamanı ağrı ilə özünü göstərə bilər", - deyə o izah edib. Şripati Ketu çox isti qəhvə və digər içkiləri qəbul edən insanlarda qida borusunun yastıhüceyrəli xərçənginin yaranma riskinin təxminən üç dəfə yüksək olduğunu göstərən tədqiqatlara istinad edib. "Əsas izahat ondan ibarətdir ki, təkrarlanan termik zədələnmələr qida borusunun selikli qişasındakı hüceyrələri davamlı olaraq bərpa olunmağa məcbur edir və bu proses zamanla xərçəngin yaranmasına səbəb ola bilər", - deyə qastroenteroloq xəbərdarlıq edib. Həkim vurğulayıb ki, risk qəhvənin öz xüsusiyyətləri ilə deyil, içkinin temperaturu ilə bağlıdır. Normal temperaturda qəbul edilən qəhvənin bu baxımdan eyni risklə əlaqələndirilmədiyi bildirilir. Qəhvə ilə bağlı termik yanıq baş verdikdə isə həkim içkini sərin, lakin buz kimi soyuq olmayan halda qəbul etməyi, duzlu su ilə qarqara etməyi və reseptsiz ağrıkəsici qəbul etməyi tövsiyə edib. Həmçinin bir neçə gün ərzində ədviyyatlı, turş, sərt və isti qidalardan uzaq durmaq məsləhət görülür.