UEFA Çempionlar Liqası: "Qarabağ"ın futbolçuları ən sürətlilər sırasındadırlar

Beynəlxalq İdman Araşdırmaları Mərkəzi (CIES) UEFA Çempionlar Liqasında çıxışını davam etdirən klubların oyunçularının matçlar zamanı nümayiş etdirdikləri sürət göstəricilərinə dair yeni hesabat yayımlayıb. Oxu.Az xəbər verir ki, beş fərqli mövqe üzrə 20 oyunçunun yer aldığı reytinq cədvəlində Ağdamın "Qarabağ" klubunun təmsilçiləri də özlərinə yer tapıblar. Müdafiənin mərkəzində çıxış edən futbolçular arasında komandanın üzvü Kevin Medina fərqlənməyi bacarıb. O, 33.5 kilometr/saat sürət yığaraq siyahının 12-ci pilləsində qərarlaşıb. Digər mövqelərin statistikasında cinah müdafiəçisi Elvin Cəfərquliyev (34.92 kilometr/saat) 6-cı, vingerlər sırasında Emmanuel Addai (35.87 kilometr/saat) 4-cü, mərkəz hücumçuları kateqoriyasında isə Kamilo Duran (33.42 kilometr/saat) 12-ci sırada mövqe tutub. Qeyd edək ki, CIES tərəfindən hazırlanan bu hesabat oyunçuların matç ərzində qeydə alınan maksimal sürət hədləri və qaçış statistikalarına əsaslanır.