Ermənistanda Metsamor AES təmirdən sonra fəaliyyətini bərpa etdi

Ermənistanın Metsamor atom elektrik stansiyası (AES) beş aylıq planlı təmirdən sonra fəaliyyətini bərpa edərək ölkənin vahid enerji sisteminə qoşulub. Oxu.Az Ermənistan KİV-ə istinadən verdiyi məlumata görə, bu barədə ölkənin ərazi idarəetmə və infrastrukturlar naziri David Xudatyan bildirib. "Planlı-profilaktik təmir işlərinin uğurla başa çatmasından sonra 2026-cı il sentyabrın 1-də Ermənistan AES-in 2 №-li enerji bloku yenidən işə salınıb və ölkənin vahid enerjisisteminə qoşulub", - deyə nazir sosial şəbəkələrdə yazıb. AES-in planlı təmiri aprelin 1-də başlayıb və müəyyən edilmiş qrafikə uyğun olaraq 153 gün davam edib. Qeyd edək ki, Metsamor AES Ermənistanda elektrik enerjisi istehsalının təxminən üçdəbirini təmin edir.