ABŞ-dən İrana ŞOK XƏBƏRDARLIQ: "Yalnız iki yolunuz var"

ABŞ yeni sanksiyalar çərçivəsində İran hakimiyyətinin bütün gəlir mənbələrini bloklamaq niyyətindədir və "İqtisadi pariya" əməliyyatına başlayır. Oxu.Az xəbər verir ki, bunu ABŞ-nin maliyyə naziri Skott Bessent mətbuat konfransında bildirib. Onun sözlərinə görə, bu gündən etibarən ABŞ Maliyyə Nazirliyi və digər qurumların qəbul etdiyi tədbirlər daha da sərtləşdiriləcək və İran İslam İnqilabı Keşikçiləri Korpusunun (SEPAH) maliyyələşdirildiyi bütün potensial gəlir mənbələri bağlanacaq. "Biz hər hansı sızmanı istisna edən yanaşmaya sadiqik", - deyə o əlavə edib. "Bu gün İran tamamilə aydın seçim qarşısındadır. Onun qarşısında yalnız iki yol açılır: tam beynəlxalq təcrid və yalnız yaşayış minimumunu təmin edən iqtisadiyyat, yaxud dünya iqtisadiyyatına yenidən inteqrasiya etmək imkanı ilə normal həyata qayıtmaq. Bu gün biz İran rejimini bütün digər mümkün variantlardan məhrum etmək üçün "İqtisadi pariya" əməliyyatına başlayırıq", - deyə nazir bildirib. O əlavə edib ki, ABŞ istənilən üçüncü ölkəyə qarşı yeni anti-İran sanksiyaları tətbiq etməyə hazırdır. "Bu gün burada açıq şəkildə bildirmək istəyirik ki, heç kim ABŞ sanksiyalarının əhatə dairəsindən kənarda deyil. Əgər onlar Tehranın tranzaksiyalarına yardım göstərirlərsə və İran neftini pula çevirən ekosistemin bir hissəsidirlərsə, onlar hədəfə çevriləcəklər", - deyə Bessent bildirib.