Tramp: "İrana qarşı əməliyyatlar tezliklə bitəcək, ardınca neft ucuzlaşacaq"

Donald Tramp ABŞ-nin İrana qarşı əməliyyatının bitməsindən sonra qısa müddət ərzində enerjidaşıyıcılarının qiymətlərinin sürətlə azalacağına ümid etdiyini bildirib. Oxu.Az-ın Aif.ru-ya istinadən xəbərinə görə, Ağ Ev lideri bunu jurnalistlərlə görüşü zamanı deyib. Onun sözlərinə görə, yanacaq bazarındakı mövcud dinamika əsasən davam edən hadisələrlə əlaqəlidir, vəziyyət yaxın gələcəkdə dəyişə bilər. O deyib ki, əsas amil ABŞ-nin əməliyyatdan çıxmasından asılıdır və bunun tezliklə baş verməsi gözlənilir. ABŞ liderinin fikrincə, bu addım qiymətlərin sabitləşməsi ilə nəticələnəcək: "Mənim həyata keçirməli olduğum tək şey İranı tərk etməkdir. Və biz bunu çox tezliklə edəcəyik və o zaman qiymətlər enməyə başlayacaq". Xatırladaq ki, daha əvvəl Donald Tramp Tehranın Vaşinqtona güzəştə gedib-getməməsindən asılı olmayaraq ABŞ-nin İrana qarşı hərbi əməliyyatına son qoyacağını bildirmişdi. Onun iddiasına görə, bu, yaxın iki və ya üç həftə ərzində baş verəcək.