KİV: Tramp İran münaqişəsində kəşfiyyat məlumatlarını gözardı edib

İrana qarşı əməliyyatdan əvvəl ABŞ hərbi kəşfiyyatı dəfələrlə öz rəhbərliyini İslam Respublikasının Yaxın Şərqdəki ərəb ölkələrindəki hədəflərə qarşı cavab zərbələri endirməsi riski barədə xəbərdar edib. Prezident Donald Tramp isə İranın Qətər, Səudiyyə Ərəbistanı, BƏƏ, Bəhreyn və Küveytə qarşı cavab zərbələrinin ABŞ üçün tamamilə sürpriz olduğunu deyib. Oxu.Az xəbər verir ki, bu barədə "Reuters" agentliyi Ağ Ev mənbələrinə istinadən məlumat yayıb. Bildirilib ki, ABŞ kəşfiyyatı Ağ Ev liderini təkcə İslam Respublikasının zərbələri barədə deyil, həm də Hörmüz boğazının bağlanması riski və qlobal iqtisadiyyat üçün bütün mənfi nəticələr barədə xəbərdar edib. Agentliyin məlumatına görə, Ağ Ev bu məlumatı görməzdən gəlib. Agentlik bunu Yaxın Şərqdəki bəzi ABŞ səfirliklərinin işçilərinin yalnız hərbi əməliyyat başladıqdan sonra təxliyəsinin başlaması ilə izah edir. Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib. İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb. Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub. İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.