Filippində vulkan püskürdü: Səmaya beş kilometrlik kül sütunu qalxdı - VİDEO

Filippinin Neqros adasında martın 15-də "Kanlaon" vulkanının güclü püskürməsi baş verib. Partlayış zamanı səmaya təxminən 5 kilometr hündürlüyündə sıx qara kül sütunu qalxıb. Oxu.Az xəbər verir ki, bu barədə Filippin Vulkanologiya və Seysmologiya İnstitutu "Facebook" səhifəsində məlumat yayıb. Bu, vulkanın cari il ərzində üçüncü püskürməsidir. Əvvəlki püskürmələr 2026-cı il fevralın 19-da və 26-da qeydə alınıb. Hazırda vulkan üçün ikinci təhlükə səviyyəsi qüvvədədir.
Hadisə yerindən yayılan videoda qaranlıq kül buludunun ətraf əraziləri bürüdüyü, daha sonra isə cənub-şərq və şimal-şərq istiqamətində hərəkət etdiyi görünür. Yeni püskürmə yerli vaxtla saat 18:07-də vulkanın zirvəsində baş verib və nəticədə beş kilometrlik kül sütunu formalaşıb. Artan aktivliyə görə vulkanın ətrafında müəyyən edilən dörd kilometrlik daimi təhlükə zonasına daxil olmaq qadağan edilib.