Myanmadа bir ay davam edən ümumi seçkinin son turu keçirilir

Myanmada bir ay davam edən ümumi seçkinin üçüncü və sonuncu turu başlayıb. Oxu.Az bu barədə "Associated Press" agentliyinə istinadən xəbər verir İlkin nəticələrə əsasən, ölkənin hakim hərbi xuntası və müttəfiqləri artıq yeni hökumət qurmaq üçün parlament çoxluğu əldə ediblər. Bildirilir ki, Həmrəylik və Birliyin İnkişafı Partiyası səsvermənin ilk iki turunda mübarizə aparılan yerlərin çoxunu qazanıb. Milli parlamentin yuxarı və aşağı palatalarındakı yerlərin 25 faizi hərbçilər üçün ayrılıb ki, bu da onlara və müttəfiqlərinə qanunverici orqana nəzarəti təmin etməyə imkan verir. İndiki hərbi hökumətə rəhbərlik edən general Min Aunq Hlainqin prezidentlik vəzifəsini icra edəcəyi gözlənilir. Xatırladaq ki, Myanmada seçkinin birinci turu 2025-ci il dekabrın 28-də, ikinci tur isə yanvarın 11-də 100 şəhərdə keçirilib.