Türkiyə Səudiyyə Ərəbistanında öz bazasını yerləşdirə bilər

Türkiyə Məkkə müqaviləsi çərçivəsində krallıqdakı hərbi mövcudluğunu genişləndirmək planları fonunda Səudiyyə Ərəbistanında öz bazasını yerləşdirə bilər. Oxu.Az-ın xəbərinə görə, bu barədə "Türkiye" nəşri məlumat verib. Daha əvvəl Ankaranın yaxın həftələrdə Səudiyyə Ərəbistanına məhdud kontingent və hərbi texnika göndərəcəyi bildirilmişdi. Türkiyə 2025-ci ildən bəri kritik əhəmiyyətli infrastrukturun qorunması üçün bu ölkədə 200-dən çox hərbi mütəxəssis, texniki qrup, hava hücumundan müdafiə və radioelektron müharibə vasitələri yerləşdirir. Nəşrin məlumatına görə, Məkkə Alyansına üzv ölkələrin (Pakistan, Səudiyyə Ərəbistanı və Türkiyə) oktyabrın 5-də Ər-Riyadda qəbul etdikləri birgə müdafiə öhdəliklərinin praktiki olaraq həyata keçirilməsinə dərhal keçid və hərbi qüvvələrin yerləşdirilməsi qərarı çərçivəsində Türkiyə özünün yaxın və ortamənzilli hava hücumundan müdafiə sistemləri vasitəsilə Səudiyyə Ərəbistanının dörd vacib qaz və elektrik enerjisi obyektlərinin müdafiəsində iştirak edəcək. Regiona göndəriləcək hərbçilərin sayı yaxın günlərdə dəqiqləşdiriləcək. Türkiyə hərbi kontingentinin Səudiyyə Ərəbistanına göndərilməsi qərarı respublika parlamenti tərəfindən qəbul edilməlidir. Bunun oktyabr ayında baş verməsi gözlənilir. Açıq mətbuatın məlumatlarına görə, Türkiyənin 12 ölkədə hərbi bazası var. Bunlardan ən böyüyü Şimali Kipr Türk Respublikasında yerləşir ki, burada 30 mindən çox hərbi kontingent xidmət çəkir. Türkiyənin bazaları, həmçinin Qətər, İraq, Suriya, Somali, Liviya və bir sıra digər ölkələrdə də mövcuddur.