Tbilisi-Tehran xəttində gərginlik: İran səfiri Gürcüstan XİN-ə çağırıldı

2026-cı il sentyabrın 30-da sosial şəbəkədə yayılan bəyanatlarla əlaqədar İran İslam Respublikasının Gürcüstandakı fövqəladə və səlahiyyətli səfiri Seyid Əli Moucani Gürcüstan Xarici İşlər Nazirliyinə çağırılıb. Oxu.Az 1tv.ge-yə istinadən xəbər verir ki, bu barədə Gürcüstan Xarici İşlər Nazirliyi məlumat yayıb. Qurumun məlumatına görə, Gürcüstan xarici işlər nazirinin müavini Aleksandre Xvti­si­aşvili İran səfirinə sosial şəbəkədə yaydığı bəyanatların diplomatik fəaliyyət çərçivəsindən kənara çıxdığını bildirib. Nazir müavini qeyd edib ki, bu cür bəyanatlar ictimai əhval-ruhiyyəyə mənfi təsir göstərir. O, İran tərəfinin müvafiq tədbirlər görəcəyinə və belə halların bir daha təkrarlanmayacağına ümid etdiyini bildirib. Onun sözlərinə görə, bu, Gürcüstan tərəfindən əlavə tədbirlərin görülməsinə ehtiyac yaranmaması üçün vacibdir. Aleksandre Xvti­si­aşvili İran səfirinə, həmçinin Gürcüstanda akkreditə olunmuş diplomatik nümayəndələrin fəaliyyətlərini diplomatik mandat və səlahiyyətləri çərçivəsində həyata keçirməli, diplomatik münasibətlərdə qəbul edilmiş normalara riayət etməli, qəbul edən ölkənin tarixi və daxili məsələlərini şərh etməkdən çəkinməli olduqlarını izah edib. Qeyd edək ki, İranın Gürcüstandakı səfiri Əli Moucani "Facebook" səhifəsində Kraliça Ketevanın təsviri ilə bağlı paylaşım edib. Səfir paylaşımında bildirib ki, həmin axşam İran İslam Respublikasının Gürcüstandakı səfirliyinin fasadı Kraliça Ketevanın təsviri ilə işıqlandırılıb. Onun sözlərinə görə, bu təsvir yalnız tarixi şəxsiyyətin xatirəsi ilə bağlı deyil, həm də bu günə qədər müxtəlif versiyaların mövcud olduğu tarixi yaddaşın simvoludur. Əli Moucani bildirib ki, yaxın zamanda Kraliça Ketevan, eləcə də İranda və Gürcüstanda qorunan sənədlər və tarixi mənbələrlə bağlı apardığı ilkin araşdırmanın nəticələrini paylaşacaq. O qeyd edib ki, təqdim ediləcək material nə rəsmi versiya, nə də Kraliça Ketevan haqqında son söz iddiası olacaq. Səfir bunun araşdırmanın hazırkı mərhələsində tarixçinin şəxsi baxışı və qiymətləndirməsi olduğunu vurğulayıb. Səfir əlavə edib ki, bu qiymətləndirmə gələcəkdə əlavə mənbələr əsasında, həmçinin gürcü və iranlı tədqiqatçıların birgə araşdırmaları nəticəsində tamamlanmalı, təhlil edilməli, tənqidi şəkildə yenidən nəzərdən keçirilməli və ya düzəliş edilə bilər. Onun sözlərinə görə, belə tarixi hadisələrin yenidən dərk edilməsi keçmişə qayıtmaqdan daha çox, bu gün bir-birini daha yaxşı və dərindən tanımaq imkanı yarada bilər.