P.Diddinin "rahat" həbsxana həyatı: Xidmətçi məhbuslar, masaj, qaçaqmalçılıq, içki, minlərlə dollarlar...

P.Diddi kimi tanınan repçi Şon Kombs həbs cəzasını həbsxanada imtiyazlı şəraitdə çəkir. Ona bir neçə məhbus xidmət göstərir ki, onlar repçi üçün yemək bişirir, təmizlik işləri görür və masaj edirlər. Oxu.Az-ın xəbərinə görə, bu barədə "NBC News" nəşri digər məhbusların anonim ifadələrinə, eləcə də foto və video görüntülərə əsaslanaraq məlumat verib. Şon Kombs Nyu-Cersi ştatındakı Fort-Diks federal həbsxanasında 37452-054 saylı məhbus kimi saxlanılır. Mənbələrin məlumatına görə, o, adət etdiyi rahatlıq səviyyəsini dəmir barmaqlıqlar arxasında qoruyub saxlamaq üçün ayda minlərlə dollar xərcləyir, pullar isə ona kömək edən məhbusların şəxsi hesablarına həbsxana xaricindən köçürülür. Bundan əlavə, Şon Kombs sosial şəbəkələri izləmək üçün telefon və planşetə, eləcə də elit alkoqola - xüsusən də konyaka çıxış əldə etmək üçün qaçaqmalçılıqdan yararlanır. Rəsmi qurumlar vəziyyətlə bağlı ətraflı açıqlama vermir. Həbsxanalar Bürosunun nümayəndəsi nəşrə bildirib ki, məxfilik, təhlükəsizlik və mühafizə ilə bağlı səbəblərdən konkret məhbusların saxlanma vəziyyəti ilə bağlı şərh vermir. O, həmçinin qeyd edib ki, qaçaqmalçılıq bir çox islah müəssisələrində daimi problem olaraq qalır. Fort-Diks həbsxanasında 4 000 məhbus saxlanılır. P.Diddi 2025-ci ilin oktyabr ayından - 50 ay müddətinə azadlıqdan məhrum edildiyi vaxtdan bəri orada saxlanılır. İfaçı cinsi istismar və fahişəliyə cəlb etmə kimi iki maddə üzrə təqsirli bilinib. Prokurorluq onun üçün 11 il həbs cəzası tələb etmişdi.