Netanyahudan BMT agentliyinə qarşı sərt addım: Qüdsdə təxliyə başladı

İsrailin Baş naziri Benyamin Netanyahu 2024-cü ildə qəbul edilmiş və Birləşmiş Millətlər Təşkilatının Fələstin Qaçqınlarına Yardım və İşlərin Təşkili üzrə Yaxın Şərq Agentliyinin İsrail ərazisində fəaliyyətini qadağan edən qanuna uyğun olaraq, qurumun Qüdsdəki kompleksinin təxliyəsinə başlandığını elan edib. Oxu.Az bu barədə TASS-a istinadən xəbər verir. "Mənim göstərişlərimə uyğun olaraq və qəbul edilmiş qanunun icrası məqsədilə bu gün (25 avqust - red.) Qüdsdə, Kafr-Akabdakı kompleksin təxliyəsinə başlanılıb", - deyə Netanyahu bildirib. "İsrail dövləti oktyabr terroru və qırğınında əməkdaşları iştirak edən bir təşkilatın öz ərazisində fəaliyyət göstərməsinə icazə verməyəcək və bütün mövcud vasitələrlə onunla mübarizə aparacaq", - deyə Netanyahu əlavə edib. İsrail tərəfi daha əvvəl də dəfələrlə iddia edib ki, bu agentliyin bir çox əməkdaşı eyni zamanda HƏMAS-ın hərbi qanadının fəaliyyətində iştirak edir.