Almaniya səmasında NƏ BAŞ VERİR? - UNO müşahidələrində rekord

Almaniyada naməlum uçan obyektlər (UNO) barədə daxil olan məlumatların sayında görünməmiş artım qeydə alınıb. Oxu.Az bildirir ki, bu barədə "Euronews" telekanalı Hessen əyalətinin Lütselbax şəhərində yerləşən Qeyri-adi Səma Fenomenlərinin Mərkəzi Tədqiqat Şəbəkəsinin (CENAP) məlumatlarına istinadən xəbər verib. Almaniya sakinlərinin müşahidə etdikləri qeyri-adi səma hadisələri barədə məlumatlar bu mərkəzdə toplanır. "Hazırda biz hər gün üçdən altıyadək məlumat alırıq. Şübhəsiz ki, almandilli məkanda UNO barədə məlumatların qəbulu üzrə ən çox yüklənmiş xidmət bizik", - deyə CENAP rəhbəri Hansyurgen Köler bildirib. Onun sözlərinə görə, avqust ayına olan məlumata əsasən, komanda artıq UNO ilə bağlı 14 000-ə yaxın müraciəti araşdırıb ki, bu da rekord göstəricidir. Əksər hallarda Almaniya sakinləri meteorlar kimi astronomik hadisələri, eləcə də müxtəlif texnoloji obyektləri - xüsusilə təyyarələri, helikopterləri, peykləri, raket pillələrini və müxtəlif şoularda istifadə olunan lazer şüalarını UNO ilə səhv salıblar. Bununla belə, mütəxəssislər bəzi hallara izah tapa bilməyiblər. * Pentaqon UNO arxivlərini yenidən AÇDI: Onilliklərin sirli görüntüləri üzə çıxdı - VİDEO Daha əvvəl Pentaqon öz saytında naməlum uçan obyektlərlə bağlı arxiv məlumatlarının beşinci paketini dərc edib. Həmin məlumat blokuna Yaxın Şərqdə çəkilmiş bir sıra videogörüntülər də daxil edilib.