"DeepSeek"in qurucusunun sərvəti artır: Reytinq cədvəli açıqlandı

Çinin "DeepSeek" şirkətinin təsisçisi Lyan Venfen süni intellekt modellərini inkişaf etdirənlər arasında qlobal miqyasda ən varlı iş adamı statusunu qazanıb. Oxu.Az xəbər verir ki, bu barədə "Bloomberg" agentliyi məlumat yayıb. "Bloomberg Billionaires Index"in reytinqinə əsasən, iş adamının kapitalı iki dəfədən çox çoxalaraq 16.7 milyard dollardan 36 milyard dollara yüksəlib. Bu artım sayəsində o, "Anthropic"in ortaq qurucusu Dario Amodeini və "OpenAI"nin ortaq qurucusu Qreq Brokmanı üstələməyi bacarıb. Qeyd olunur ki, Venfenin aktivlərinin böyük qismi "DeepSeek" şirkətindəki səhmlərindən ibarətdir. Agentliyin məlumatına əsasən, investorların böyük diqqəti şirkətin bazar dəyərini 10 milyard dollar səviyyəsində olduğu aprel ayı ilə müqayisədə təqribən beş dəfə artırıb. Həcmi 7.4 milyard dollar olan 2026-cı ilin iyun ayındakı investisiya raundundan sonra "DeepSeek"in ümumi dəyəri 50 milyard dollara yüksəlib. Lyanın özünün 3 milyard dollar sərmayə yatırdığı bu prosesin yekununda onun şirkətdəki payı təqribən 78 faizə düşüb. Mövcud 36 milyard dollarlıq kapitalı ilə Lyan Venfen Çinin ən zəngin şəxsləri siyahısında səkkizinci pillədə qərarlaşır. O, süni intellekt sektorunda fəaliyyət göstərən biznesmenlər arasında sadəcə "Cambricon Technologies"in təsisçisi Çen Tyanşidən geri qalır.