ABŞ-nin gizli arxivlərində UNO-larla bağlı maraqlı detallar ortaya çıxdı - FOTO

Federal Təhqiqatlar Bürosunun (FTB) açıqladığı məxfi sənədlərdə ABŞ-nin nüvə silahları ilə əlaqəli mühüm hərbi obyektlərinin yaxınlığında müşahidə olunan parlaq obyektlər, yaşıl alov topları və izaholunmaz işıq hadisələri barədə məlumatlar yer alıb. Oxu.Az xəbər verir ki, bu barədə "Fokus" nəşri məlumat yayıb. Bildirilir ki, həmin hadisələrlə bağlı kəşfiyyat xidmətləri xüsusi hesabat sistemləri yaradıb və obyektlərin milli təhlükəsizlik üçün təhlükə yaradıb-yaratmadığını müəyyən etmək məqsədilə elmi araşdırmalara başlayıblar. Məxfilikdən çıxarılan FTB sənədlərinin böyük hissəsi İkinci Dünya müharibəsindən sonra ABŞ-nin nüvə silahları əməliyyatlarının əsas mərkəzlərindən biri olmuş Nyu-Meksiko ştatının Albukerke şəhərində yerləşən "Sandia" bazası ilə bağlıdır.
Sənədlərə əsasən, 1948-ci ilin dekabrından 1950-ci ilin mayına qədər ən azı 209 izaholunmaz hava hadisəsi qeydə alınıb. Bu anomal hadisələrin əksəriyyəti atom tədqiqat mərkəzləri və Strateji Hava Komandanlığının obyektləri yaxınlığında müşahidə edilib. Ən qeyri-adi araşdırmalardan biri 1949-cu il iyulun 24-də Nyu-Meksikonun Sokorro şəhəri yaxınlığında baş verən hadisədən sonra aparılıb. Alimlər səmada görünən alovlu obyektlə əlaqəli ola biləcək mikroskopik hissəcikləri havadan toplamağa çalışıblar. Tədqiqatçılar partlayışa bənzər hadisələrdən sonra atmosferdə yayılan xırda maddələri toplamaq üçün xüsusi avadanlıqlardan istifadə ediblər.
66-cı magistral yolunun şimalında, 84-cü marşrut boyunca toplanan hava tozu nümunələrində çoxlu sayda mis tərkibli hissəciklər aşkarlanıb. Alimlər ətraf mühitdə rast gəlinən adi materiallardan kəskin şəkildə fərqlənən dənəvər fraqmentlər və sferik hissəciklər barədə məlumat veriblər. Bəzi hissəciklərin diametrinin 30 mikrona çatdığı, digərlərinin isə təxminən 12 mikron diametrində demək olar ki, ideal kürə formasında olduğu qeyd edilib. Sənədlərdə UNO müşahidələrindən dərhal sonra birbaşa səmadan material toplamaq məqsədilə planlaşdırılmış aviasiya missiyaları barədə də məlumat yer alıb. Rəsmilər adi toz nümunələri ilə çirklənmədən əvvəl müəmmalı obyektlərin atmosferdə buraxdığı izləri araşdırmaq üçün yüksəksürətli təyyarələrdən istifadə imkanını nəzərdən keçiriblər. FTB-nin açıqladığı materiallarda obyektlərin yerdənkənar mənşəli olduğu birbaşa təsdiqlənməsə də, hərbi rəhbərlik, xüsusi xidmət orqanları və alimlərin bu hadisələrə son dərəcə ciddi yanaşdığı vurğulanıb. Sənədlər həmçinin Nyu-Meksikoda yerləşən və uzun illərdir hərbi bazalar yaxınlığında UNO fəallığı ilə əlaqələndirilən "nüvə üçbucağı"na marağı yenidən artırıb. Arxivlərin yayımlanması göstərib ki, hökumət qurumları bu anomal hadisələri sadəcə rədd etməyib, onların araşdırılmasına böyük elmi, hərbi və zaman resursları ayırıb.