İsrail Tehrandakı yeraltı raket sınaq obyektini vurdu

İsrail Müdafiə Qüvvələri (ÇAXAL) Tehrana gecə hava zərbələrinin növbəti seriyası çərçivəsində SEPAH üçün ballistik raketlərin hazırlanması və sınaqlarının aparılması üçün nəzərdə tutulan yeraltı obyekti vurub.

Axar.az xəbər verir ki, bu barədə ÇAXAL məlumat yayıb.

"Ən mühüm zərbələrdən biri SEPAH-ın sərəncamında olan silah tədqiqat və hazırlama kompleksinə endirilib", - məlumatda bildirilib.

Kompleks SEPAH-ın Mərkəzi Hərbi Universitetinin ("İmam Xomeyni") mərkəzində yerləşirdi və əməliyyat fəaliyyəti üçün ehtiyat obyekt və toplanma yeri kimi xidmət edirdi.

Qeyd olunan komplekslə yanaşı, İsrail həmçinin Qüds qüvvələrinin baş qərargahının ərazisindəki infrastruktur obyektlərə və Tehranın silah və müdafiə sistemlərinin istehsalı ilə məşğul olan digər müəssisələrə zərbələr endirib.