Tanışının çiyninə toxunduğuna görə öldürüldü - Mərhumun anasından İLGİNC İFADƏ

Bakıda xuliqanlıq zəminində qətl törətməkdə ittiham olunan Natiq İmamcanov və Afiq Hacıəliyevin cinayət işləri üzrə məhkəmə prosesi keçirilib. Oxu.Az-ın məlumatına görə, Bakı Ağır Cinayətlər Məhkəməsində hakim Eldar İsmayılovun sədrliyi ilə keçirilən iclasda qətlə yetirilən Turan Əliyevin anası Şəfəq Əliyeva ifadə verib. O deyib ki, hadisədən bir müddət əvvəl oğlu ilə birlikdə çörək almağa gedərkən məhəllədə mübahisə düşüb: "Yolda bir nəfər oğlumun çiyninə dəydi və aralarında mübahisə yarandı. Oğlum həmin şəxsi sakitləsdirərək mübahisədən yayındı. Mən Turanı kənara çəkdim və evə qayıtdıq. Bir neçə gün sonra kiçik oğlum dedi ki, məsələ böyüyüb, Turanın üstünə adam göndərmək istəyirlər. Martın 8-də oğlum siqaret almaq üçün evdən çıxdı. Təxminən yarım saat sonra kürəkənim qızıma zəng edərək Turanın bıçaqlandığını bildirdi. Hadisə yerinə qaçdıq. Oradan qışqırıq səsləri gəlirdi. Afiqi gördüm, əlində üzərində qan izləri olan bıçaq var idi. Mənə dedi ki, get, oğluna bax. Natiq isə aqressiv şəkildə üzərimə gəldi və "oğlun elə ölməyə layiq idi" dedi". Məhkəmənin növbəti iclası aprelin 1-nə təyin olunub. Xatırladaq ki, ötən il Bakı şəhəri ərazisində Afiq Hacıəliyev mübahisə zəminində tanışı Turan Əliyevə bıçaqla xəsarət yetirərək onu öldürüb. Hadisə günü tanışı Natiq İmamcanovla birlikdə olan Afiq Hacıəliyev təqsirləndirilən şəxs qismində məsuliyyətinə cəlb olunub. A.Hacıəliyevə Cinayət Məcəlləsinin 120.2.4 (xüsusi amansızlıqla qəsdən adam öldürmə), N.İmamcanova isə 221.3-cü (xuliqanlıq, silah və ya silah qismində istifadə olunan əşyalarla törədildikdə) maddələri ilə ittiham irəli sürülüb. Elgün Həsənli