"KPMG Law Azərbaycan" hüquq bazarında süni intellekt və innovasiyalar üzrə liderliyini nümayiş etdirir

"KPMG Law Azərbaycan" fevralın 5-də Bakıda ikinci dəfə keçirilən "LEGIS Hüquq Forumu"nda qızıl pponsor qismində iştirak edərək regionun hüquq və biznes ekosistemində innovativ yanaşmaları ön plana çıxarıb. Forum dövlət qurumlarının yüksəksəviyyəli nümayəndələrini, özəl sektor liderlərini və 1000-ə yaxın hüquq peşəkarını bir araya gətirərək hüquq sahəsində aktual çağırışlar və rəqəmsal transformasiya meyilləri üzrə geniş müzakirə mühiti yaradıb. Forum çərçivəsində təşkil olunan "Süni İntellekt və Hüquq: Tənzimləmə, Məsuliyyət və Gələcək İmkanlar" adlı panel müzakirəsində "KPMG Law" Almaniyanın Hüquq və Süni İntellekt (Sİ) üzrə meneceri Martin Knost çıxış edərək beynəlxalq təcrübəyə əsaslanan yanaşmalarını iştirakçılarla bölüşüb. O, Sİ-nin hüquq xidmətlərinin göstərilmə modelini necə dəyişdirdiyini, Avropa İttifaqının "AI Act" kimi tənzimləyici təşəbbüslərinin biznes və hüquq praktikası üçün yaratdığı yeni reallıqları, həmçinin məsuliyyət və risk idarəetməsi aspektlərini ətraflı şəkildə təhlil edib. Çıxış iştirakçılar tərəfindən böyük maraqla qarşılanıb və aktiv müzakirələrlə davam etdirilib. Tədbir çərçivəsində "KPMG Digital Gateway for Law" platforması da təqdim olunub. Bu innovativ həll hüquq komandalarına qabaqcıl texnologiyalar, məlumat analitikası və Sİəsaslı alətlər vasitəsilə proseslərin optimallaşdırılması, risklərin proaktiv idarə olunması və müştərilər üçün daha yüksək əlavə dəyərin yaradılması imkanlarını təqdim edir. Forumun bağlanışından sonra "KPMG Law Azərbaycan", AHK Almaniya-Azərbaycan Ticarət Palatası ilə əməkdaşlıq çərçivəsində fevralın 6-da "AI in Law: What Works, What Fails, What's Next?" mövzusunda Martin Knostun çıxışı ilə biznes səhər yeməyi təşkil edib. Tədbir hüquq şöbələri və hüquq firmalarının real Sİ tətbiqlərini nümayiş etdirərək, Sİ-nin hüquq proseslərinə təsirini, effektiv yanaşmaları və qarşıya çıxan çətinlikləri dərin analiz edib. Sessiya iştirakçılara 2026-cı ilə qədər hüquq və tənzimləmə sahəsində Sİ-nin gətirəcəyi imkan və çağırışlara dair aydın, praktik və strateji baxış təqdim edib, diskussiyalar çərçivəsində konkret nümunələr və ən yaxşı təcrübələr paylaşılıb. "KPMG Law Azərbaycan" və Özbəkistanın rəhbəri, Seymur Niftaliyev mövzu ilə bağlı bildirib: "Biz hüquq və texnologiyanın kəsişməsində yeni imkanlar yaratmağa çalışırıq. Məqsədimiz müştərilərimiz üçün ən effektiv, real dəyər yaradan həlləri təqdim etmək və hüquq sahəsində innovativ yanaşmaların tətbiqini sürətləndirməkdir. Sİ və "legal tech" artıq gələcəyin vizyonu deyil, gündəlik fəaliyyətimizin ayrılmaz və strateji hissəsidir." "KPMG Law Azərbaycan" hüquq sektorunda rəqəmsal transformasiyanın, innovativ hüquqi həllərin və beynəlxalq təcrübənin tətbiqinin təşviqi istiqamətində fəal fəaliyyətini davam etdirir.