Elçin Əmirbəyov: "Cənubi Qafqazda sülh Azərbaycanın əsas hissəsi ilə Naxçıvan arasında birbaşa quru əlaqəsini təmin edəcək"

Türkmənistanın Xəzər dənizi sahilindəki Avaza kurort şəhərində 8-9 oktyabr tarixlərində üç yüksək səviyyəli böyük regional sammit keçirilib. Bu sammitlər Mərkəzi Asiya, Azərbaycan və Müstəqil Dövlətlər Birliyi (MDB) liderlərini bir araya gətirib: C6 sammiti (Mərkəzi Asiya + Azərbaycan), MDB Dövlət Başçıları Şurası və Xəzər Ekoloji Sammiti. Sammitlər zamanı enerji, ticarət, nəqliyyat və nəqliyyat infrastrukturu məsələləri, eləcə də regionun təbii sərvətlərindən rasional (səmərəli) istifadə və Xəzər dənizi ərazisinin kiçilməsi kimi məsələlər müzakirə edilib. Oktyabrın 8-də baş tutan Mərkəzi Asiya və Azərbaycan liderlərinin səkkizinci görüşündə ticarət, nəqliyyat və təhlükəsizlik məsələləri üzrə geniş birgə bəyanat qəbul edilib. Bu, həm də Azərbaycana bu formatda tam üzvlük verildikdən sonra "altılıq" ölkələrinin bu səviyyədə ilk sammiti kimi yadda qalıb. Oxu.Az xəbər verir ki, Azərbaycan Respublikası Prezidentinin xüsusi tapşırıqlar üzrə nümayəndəsi Elçin Əmirbəyov "NE Global" nəşrinə Avazada keçirilən sammitlərin əhəmiyyəti, əldə olunan nəticələr və qarşıya qoyulan məqsədlərlə bağlı fikirlərini bölüşüb. "Prezident İlham Əliyevin "Avaza"dakı üç sammitində iştirakı Azərbaycanın Mərkəzi Asiya ilə əməkdaşlığın gücləndirilməsi və Xəzər regionundakı ortaq problemlərin həllinə sadiqliyini əks etdirir", - deyə Elçin Əmirbəyov vurğulayıb. O əlavə edib ki, bu tədbirlər bir-biri ilə sıx əlaqəli olan üç prioriteti birləşdirib: regional dialoq, iqtisadi inkişaf və ekoloji təhlükəsizlik. Elçin Əmirbəyovun sözlərinə görə, Azərbaycanın Mərkəzi Asiya ölkələrinin konsultativ formatında tamhüquqlu iştirakı bu münasibətlərdə yeni mühüm bir fəsli açır. "Bizim Mərkəzi Asiya ölkələri ilə ticarətimiz ötən il 50 faizdən çox artıb, birgə investisiya fondları isə sənaye əməkdaşlığı üçün imkanlar açır. Azərbaycan artıq Qazaxıstan və Türkmənistan neftinin beynəlxalq bazarlara tranzitini asanlaşdırır, bizim Qazaxıstan və Özbəkistanla Yaşıl Enerji Dəhlizi üzrə əməkdaşlığımız isə bu tərəfdaşlığı bərpa olunan enerji sahəsində genişləndirir", - deyə o əlavə edib. Prezidentin xüsusi tapşırıqlar üzrə nümayəndəsi bildirib ki, nəqliyyat əlaqələrinin və transxəzər rəqəmsal infrastrukturunun genişləndirilməsi ilə yanaşı, bu təşəbbüslər Orta Asiya və Cənubi Qafqaz regionlarını bir-birinə daha da yaxınlaşdıraraq onların Avropa ilə əlaqələrini gücləndirir. Elçin Əmirbəyov qeyd edib ki, Cənubi Qafqazda genişlənən sülh TRIPP layihəsini də özündə ehtiva edən Zəngəzur dəhlizi vasitəsilə Orta Dəhliz şəbəkəsini inkişaf etdirmək üçün fürsət yaradır, həmçinin Azərbaycan əsas hissəsi ilə Naxçıvan arasında Ermənistanın cənubundakı Sünik vilayəti vasitəsilə Avropaya birbaşa quru yolu ilə əlaqəni təmin edir. Elçin Əmirbəyovun sözlərinə görə, Naxçıvan Dəmir Yolunun Azərbaycan Dəmir Yolları tərəfindən modernləşdirilməsi bu əlaqənin əsas hissəsidir və işlərin tamamlanmasından sonra proqnozlaşdırılan 15 milyon ton illik yükdaşıma tutumu ilə Türkiyə ilə əlaqələrin davamını təmin edəcək. "Türkmənbaşı limanının Azərbaycan üzərindən bu marşrutla birləşdirilməsi Qərbi Çindən Özbəkistan və Türkmənistan vasitəsilə Avropa bazarları ilə əlaqələri gücləndirə bilər ki, bu da iştirakçı ölkələrə davamlı sülhə ortaq iqtisadi maraq yaradacaq", - deyə o əlavə edib.