Rusiya və Çinin ABŞ-nin "Qızıl qübbə"sinə qarşı planı

Rusiya və Çin ABŞ-nin "Golden dome" ("Qızıl qübbə") raket əleyhinə müdafiə sisteminin effektivliyini asanlıqla aşağı sala bilərlər. Oxu.Az xəbər verir ki, bu barədə ABŞ-nin Xarici Siyasət Araşdırmaları Mərkəzinin (FPRI) hesabatında qeyd olunur. Bildirilir ki, "Qızıl qübbə" raketləri sürətlənmə mərhələsində vurmaq üçün nəzərdə tutulmuş kosmik tutucu peyklər eşelonuna malik aviahücumdan müdafiə layihəsidir. Hesabat müəlliflərinin fikrincə, KXDR, Çin və ya Rusiyanın raketlərindən qorunmaq üçün minlərlə, hətta on minlərlə belə aparata ehtiyac duyulacaq. İlkin xərclərin onlarla və ya yüzlərlə milyard dollar olacağı təxmin edilir. Peyklərin istismar müddətinin təxminən 5 il olduğunu nəzərə alsaq, hər il onların yenilənməsinə ümumi dəyərin beşdə birini xərcləmək lazım gələcək. Sistemin ən böyük zəifliyi tutma vaxtının qısa olmasıdır. Rusiya və Çin mühərrikləri daha sürətli yanan raketlər inkişaf etdirərək bu müddəti daha da qısalda bilərlər. Sənəddə sadalanan digər əks-tədbirlər arasında peykləri "kor etmək" üçün yerüstü lazerlər, peyk əleyhinə raketlər, kosmik minalar və əlavə döyüş başlıqlarının yerləşdirilməsi yer alır. FPRI analitikləri kosmik tutucuları asanlıqla dəf edilə bilən, eyni zamanda ABŞ-ın rəqibləri tərəfindən sabitliyi pozan hərəkətlərə təkan verə biləcək "həssas və bahalı müdafiə" adlandırırlar. ABŞ Prezidenti Donald Tramp "Golden dome" layihəsinin yaradılması təşəbbüsünü 2025-ci ilin yanvarında irəli sürüb. O, layihənin dəyərini 175 milyard dollar olaraq qiymətləndirir və sistemin 2029-cu ilə qədər istifadəyə veriləcəyini vəd edir. Konqresin Büdcə İdarəsinin hesablamalarına görə isə layihəyə 20 il ərzində 161 milyard dollardan 542 milyard dollara qədər vəsait tələb olunacaq. Moskva və Pekində bu layihə sabitliyə təhdid və kosmik fəzanın hərbiləşdirilməsi istiqamətində atılan addım kimi qiymətləndirilib.