Coy-Lens Mikels Georgi Adamiyanın göstəricisini təkrarlayıb

"Sabah" klubunun ulduzu Coy-Lens Mikels Azərbaycan çempionatında bütün zamanların ən məhsuldar legioneri rekorduna şərik olub. Oxu.Az-ın Peşəkar Futbol Liqasının rəsmi saytına istinadən yaydığı məlumata görə, almaniyalı hücumçu vurduğu qolların sayına əsasən gürcüstanlı sabiq futbolçu Georgi Adamiyaya məxsus zirvəyə yüksəlib. Forvard bu tarixi uğura Misli Premyer Liqasının IV turu çərçivəsində "Zirə"nin qapısından üç top keçirərək (5:0) rəsmiləşdirdiyi het-trik sayəsində çatıb. Baxmayaraq ki, Badri Kvaratsxeliya və Filip Ozobiçin aktivində daha çox qol var, lakin onların hər ikisi müxtəlif vaxtlarda Azərbaycan yığmasının şərəfini qoruduğu üçün bu statistikada sırf legioner statusu daşımır. Matçda vurulan ikinci top Mikelsin Premyer Liqa karyerasında 60-cı yubiley qolu kimi qeydə alınıb, ardınca isə hücumçu bu rəqəmi 61-ə çatdırmağı bacarıb. Azərbaycanda yalnız "Sabah"ın formasını geyinən forvard, bu parlaq statistikaya debüt etdiyi 2021/22 mövsümündən bəri meydana çıxdığı cəmi 113 qarşılaşmada sahib olub. Qeyd edək ki, futbolçu, eyni zamanda, ölkə çempionatında yerinə yetirdiyi penalti zərbələrinin sayını da 10-a yüksəldib və o bu imkanların 9-nu dəqiq reallaşdırıb.