İngiltərə Premyer Liqasında transfer rekordu yeniləndi

İngiltərə Premyer Liqası klubları yay transfer pəncərəsində futbolçu keçidlərinə xərclənən ümumi məbləğ üzrə yeni rekorda imza atıblar. Oxu.Az BBC-yə istinadən xəbər verir ki, Premyer Liqa təmsilçiləri bu yay transferlərə ümumilikdə 3.46 milyard funt sterlinq (7.94 milyard manat) xərcləyiblər. Bununla da ötən il qeydə alınmış rekord yenilənib. 2025-ci ilin yayında klubların ümumi xərci 3.14 milyard funt sterlinq (7.2 milyard manat) təşkil etmişdi. Yay transfer pəncərəsində bonus ödənişləri nəzərə alınmadan ən bahalı keçid Enzo Fernandesin "Çelsi"dən "Mançester Siti"yə 125 milyon funt sterlinqə transferi olub. İkinci sırada Morqan Rocersin "Aston Villa"dan "Çelsi"yə 117 milyon funt sterlinqə keçidi qərarlaşıb. Elliot Anderson "Nottingem Forest"dən "Mançester Siti"yə 116 milyon, Bredli Barkola PSJ-dən "Liverpul"a 107 milyon, Sandro Tonali isə "Nyukasl"dan "Tottenhem"ə 101 milyon funt sterlinqə transfer olunub. Qeyd edək ki, transfer pəncərəsinin son günündə Premyer Liqa klubları futbolçu keçidlərinə 475 milyon funt sterlinq xərcləyiblər. Bu, ötən ilin eyni günündəki göstəricidən 84 milyon funt sterlinq çoxdur. Yay transferlərində ən çox vəsait xərcləyən klub isə "Mançester Siti" olub. Mançester təmsilçisi futbolçu transferlərinə ümumilikdə 458 milyon funt sterlinq sərf edib.