"Google"dan sonra "Apple Maps" də Trampın xahişinə əməl etdi: Gölün adını dəyişdirdi

"Apple" şirkəti ABŞ Prezidenti Donald Trampın Ontario gölünün adının "Amerika gölü" olaraq dəyişdirilməsi barədə fərman imzaladıqdan sonra özünün "Apple Maps" xəritələrinin veb-versiyasında Ontario gölünün adını "Amerika gölü" olaraq dəyişdirib. Bu barədə Oxu.Az "Reuters" agentliyinə istinadən xəbər verir. "Apple" şirkətindən bildirilib ki, ad dəyişikliyini yalnız ABŞ-dəkı istifadəçilər görəcək, kanadalı istifadəçilər isə gölü "Ontario gölü" kimi görməyə davam edəcəklər. Şirkətdən təsdiqləyiblər ki, ABŞ istifadəçiləri "Amerika gölü" adını ABŞ Coğrafi Adlar Məlumat Sistemində su hövzəsinin adının dəyişdirilməsindən sonra görəcəklər. Lakin digər tərəfdən, beynəlxalq istifadəçilərin ekranlarında isə hər iki ad birlikdə yer alır. Xatırladaq ki, daha əvvəl, avqustun sonunda "Google"un sahibi "Alphabet" "Google Maps"də gölün adını "Amerika gölü" olaraq dəyişdirmişdi. Ontario gölü ABŞ və Kanada sərhədindəki beş böyük göldən biridir və Müqəddəs Lavrenti çayı vasitəsilə Atlantik okeanına çıxmazdan əvvəl onların zəncirində sonuncudur. Gölün su səthinin sahəsi təxminən 19 000 kvadrat kilometrdir, orta dərinliyi 86 metr, maksimum dərinliyi isə 244 metr təşkil edir. Həcminə görə Ontario Böyük göllərin ikinci ən kiçik gölüdür. Ötən gün ABŞ daxili işlər naziri Duq Berqam bəyan etmişdi ki, Prezident Donald Tramp gölün adının dəyişdirilməsi xahişi ilə birbaşa ABŞ şirkətinə müraciət edib. ABŞ lideri avqustun 27-də Ontario gölünün adının "Amerika gölü" olaraq dəyişdirilməsi barədə fərman imzalayıb. Tramp öz qərarını Vaşinqtonun Ontario ilə gələcəkdə biznes aparmağı gözləməməsi ilə izah edib.