Fernando Alonso "Formula-1"də 52 illik rekordu yenilədi

"Formula-1"in əfsanəvi ikiqat dünya çempionu Fernando Alonso Niderland Qran-prisində unikal bir nailiyyətlə diqqətləri üzərinə çəkib. Oxu.Az xəbər verir ki, "Aston Martin"in komandasında çıxış edən 45 yaşlı ispaniyalı ulduz Zandfort trasında gərgin keçən yarışda finiş xəttini doqquzuncu keçərək aktivinə iki xal yazdırıb. Bu nəticə ilə o, son 52 illik tarix ərzində "kral yarışları"nda xal əldə etməyi bacaran ən yaşlı pilot kimi tarixə düşüb. Qeyd edək ki, "Formula-1" yarışlarında 45 və daha yuxarı yaşda xal qazanan sonuncu sürücü britaniyalı Qrem Hill olmuşdu. O, uzaq 1974-cü ildə baş tutan İsveç Qran-prisini altıncı yerdə tamamlamışdı. Təəssüf ki, həmin tarixi nəticədən təxminən 1.5 il sonra ikiqat dünya çempionu baş verən faciəli təyyarə qəzasında həyatını itirmişdi. Xatırladaq ki, peşəkar karyerasına 2001-ci ildə başlayan Alonsonun "Formula-1" arxivi zənginliyi ilə seçilir. Təcrübəli pilotun hesabında 437 Qran-pri, 32 möhtəşəm qələbə və 106 podium sevinci var. 2005 və 2006-cı illərdə "Renault" ilə zirvəni fəth edərək dünya çempionu adını qazanan ispaniyalı sürücü, 2023-cü ildən etibarən "Aston Martin"in uğurları üçün sükan arxasına keçir. Əlavə edək ki, avtoidman həvəskarlarının səbirsizliklə gözlədiyi "Formula-1" üzrə növbəti mərhələ sentyabrın 4-dən 6-dək İtaliyanın məşhur Monza trasında təşkil olunacaq.