Venesuelada möcüzəvi xilas: Zəlzələdən bir ay sonra pudel dağıntılar altından sağ çıxarıldı

Venesuelada xilasedicilər dağıdıcı zəlzələdən təxminən bir ay sonra dağıntılar altından Beyli adlı kiçik pudeli sağ çıxarıblar. Oxu.Az xəbər verir ki, bu barədə "Need To Know" portalı məlumat yayıb. Məlumata görə, it həlak olmuş sahibəsinin cəsədinin yanında qıvrılmış vəziyyətdə tapılıb. Beton konstruksiyaların altında qalan pudel aşkar edilən zaman demək olar ki, hərəkət edə bilmirdi. Heyvana dərhal tibbi yardım göstərilib, daha sonra isə sahibəsinin ailəsinə təhvil verilib. Zəlzələ zamanı 11 yaşlı Viktoriya və atası Xayro sağ qalıblar. Hazırda onlar müvəqqəti sığınacaqda yaşayırlar. Viktoriya sosial şəbəkələrdə Beylinin tədricən sağalmasını əks etdirən görüntüləri paylaşıb. Zəlzələ iyunun 24-ü axşam saatlarında Venesuelada baş verib. Təxminən 40 saniyə fərqlə maqnitudası 7,2 və 7,5 olan iki güclü yeraltı təkan qeydə alınıb. Episentrlər Yarakuy ştatında bir-birindən təxminən 10 kilometr məsafədə yerləşib. Təbii fəlakətdən sonra 1 350 afterşok qeydə alınıb. Venesuela hakimiyyətinin son məlumatına görə, zəlzələ nəticəsində 5 398 nəfər həlak olub, 116 740 nəfər isə xəsarət alıb.
{{gallery}}