Cərrahiyyədə ilk: İflic olan qolun funksiyası bərpa edilib

Çin cərrahları qolun hərəkət qabiliyyətini bərpa etmək məqsədilə ilk dəfə olaraq real pasiyentə neyrokompüter interfeysi implantasiya ediblər. Oxu.Az xəbər verir ki, bu barədə "Yicai" nəşri məlumat yayıb. Bildirilib ki, cərrahi müdaxilə Şanxayda yerləşən Fudan Universitetinin nəzdindəki Huaşan xəstəxanasının mütəxəssisləri tərəfindən həyata keçirilib. Pasiyent 10 il əvvəl yol-nəqliyyat hadisəsi zamanı onurğa beynindən ağır zədə almış və bunun nəticəsində əlindən tam istifadə etmək bacarığını itirmişdi. Hərtərəfli tibbi yoxlamalardan sonra həkimlər ona sinir siqnallarını oxuyan və deşifrə edən beyin implantı yerləşdiriblər. Bu qurğu beyinlə xarici cihaz - robotlaşdırılmış əlcək arasında əlaqə kanalı yaradır. Tibb işçilərinin sözlərinə görə, əməliyyatdan sonra xəstənin həyati göstəriciləri normal səviyyədədir, qeydə alınan beyin siqnallarının keyfiyyəti isə gözlənilən standartlara tam uyğundur. Tətbiq edilən bu sistem Çində neyrokompüter interfeysi əsasında qolun hərəki funksiyasının qismən bərpası üçün klinik istifadəsinə icazə verilmiş ilk texnologiyadır. Çinin Tibbi Preparatlara Nəzarət üzrə Dövlət İdarəsi bu sistemin istifadəsinə martın 13-də razılıq verib. Huaşan xəstəxanasında icra olunan əməliyyat həmin texnologiyanın laboratoriya tədqiqatları çərçivəsindən kənarda, yəni adi klinik təcrübədə istifadə edildiyi ilk hal kimi tarixə düşüb. Neyrokompüter interfeyslərinin inkişaf etdirilməsi Çinin elmi-texnoloji siyasətinin ən vacib prioritet istiqamətlərindən biridir. ÇXR hökumətinin fəaliyyəti haqqında mart ayında təqdim olunmuş hesabatda bu cür texnologiyalar gələcəyin ən perspektivli sahələri sırasında qeyd edilib.