ABŞ-də hantavirusla mübarizənin aktiv mərhələsi rəsmən başa çatdı

Amerika Birləşmiş Ştatlarında hantavirus epidemiyasının qarşısının alınması üzrə aktiv faza rəsmən bitmiş sayılır. Oxu.Az xəbər verir ki, bu məlumatı "The Wall Street Journal" Xəstəliklərə Nəzarət və Profilaktika Mərkəzinin (CDC) rəhbəri Cey Bxattaçaryanın açıqlamasına əsasən yayıb. Onun sözlərinə görə, qəbul edilən qərar ABŞ hökumətinin indiyədək hantavirus infeksiyasının qarşısını almağa yönəltdiyi əhəmiyyətli maddi və insan resurslarını sərbəst buraxmağa imkan verəcək. Yayılmanın pik nöqtəsində onunla mübarizəyə CDC-nin yüzdən çox mütəxəssisi cəlb olunmuşdu və onlar indi digər vəzifələrə fokuslana biləcəklər. Bu həftənin əvvəlində "MV Hondius" kruiz gəmisinin göyərtəsində olan və hantavirus yayılmasının episentrində qalan 18 ABŞ-linin hamısı təcrid rejimindən azad edilib. Ümumdünya Səhiyyə Təşkilatı (ÜST) gəminin üç sərnişininin sağ qalmadığını təsdiqləyib. Hazırda layner artıq yeni kruizdədir. Ötən həftə ərzində ÜST-nin baş direktoru Tedros Adhanom Qebreyesus qlobal miqyasda son üç həftədə yeni hantavirusa yoluxma hallarının, bir aydan artıq müddətdə isə ölüm faktının qeydə alınmadığını diqqətə çatdırıb.