Həftə ərzində Bakıda hansı mədəni tədbirlər olacaq? - AFİŞA - FOTO

Bakı sakinlərinin və şəhərimizin qonaqlarının asudə vaxtlarını səmərəli keçirmələri üçün içərisində olduğumuz həftənin mədəniyyət tədbirlərinin afişasını təqdim edirik. Oxu.Az xəbər verir ki, martın 23-dən martın 29-dək paytaxtda bir çox tamaşalar, konsertlər baş tutacaq. Azərbaycan Dövlət Akademik Milli Dram Teatrında: Martın 26-da saat 19:00-da gürcü nasir Qoderzi Çoxelinin "Küknarlara məktub" hekayəsi əsasında hazırlanmış tamaşa göstəriləcək. Tamaşanın quruluşçu rejissoru Nigar Güləhmədovadır. Biletlərin qiyməti 10-12 manatdır.
Martın 27-də saat 19:00-da İtaliyanın məşhur komedioqrafı, dramaturqu, ssenaristi, rejissoru, aktyoru Eduardo de Filipponun "Filumena Marturano" tamaşası oynanılacaq. Biletlərin qiyməti 8-15 manatdır.
Martın 28-də saat 19:00-da Cəlil Məmmədquluzadənin "Dəli yığıncağı" tamaşası göstəriləcək. Biletlərin qiyməti: 8-15 manat.
Martın 29-da saat 19:00-da A.Saqarelinin "Xanuma" tamaşası olacaq. Biletlərin qiyməti 8-15 manatdır.
Azərbaycan Dövlət Milli Gənc Tamaşaçılar Teatrında (GTT): Martın 28-də saat 12:00-da Şarl Perronun nağılı əsasında hazırlanmış "Büllur başmaq" tamaşası nümayiş etdiriləcək. Nağıl-tamaşanın quruluşçu rejissoru Ayla Osmanovadır. Biletlərin qiyməti 8-12 manatdır.
Martın 28-də saat 19:00-da Pərvin Nurəliyevanın "Mən öləndə ağlama" tamaşası oynanılacaq. Quruluşçu rejissor: Ayla Osmanova Biletlərin qiyməti 10 manatdır.
Martın 29-da saat 19:00-da Mehriban Ələkbərzadənin "Kod adı: VXA" tarixi-sənədli dram əsəri təqdim ediləcək. Tamaşanın quruluşçu rejissoru Əməkdar incəsənət xadimi Mehriban Ələkbərzadədir. Biletlərin qiyməti 10-15 manatdır.
Azərbaycan Dövlət Akademik Musiqili Teatrında: Martın 24-də, saat 19:00-da Üzeyir Hacıbəylinin "O olmasın, bu olsun" tamaşası. Tamaşanın quruluşçu rejissoru Xalq artisti Cənnət Səlimovadır. Biletlərin qiyməti: 8-15 manat.
Martın 26-da, saat 19:00-da "Arşın mal alan" ikihissəli operettası. Tamaşanın quruluşçu rejissoru Elvin Mirzəyevdir. Biletlərin qiyməti: 8-15 manat
Martın 28-də saat 19:00-da dünyaşöhrətli musiqiçi Elvis Preslinin ölməz əsərləri əsasında "Sən kralsan" tamaşası oynanılacaq. Müzikl janrında olan tamaşanın libretto müəllifi və quruluşçu rejissoru Ələkbər Tağızadədir. Biletlərin qiyməti: 10-25 manat.
Martın 29-da saat 19:00-da Elçinin "Baladadaşın toy hamamı" tamaşası oynanılacaq. Lirik komediya janrında olan tamaşanın quruluşçu rejissoru Xalq artisti Cənnət Səlimovadır. Biletlərin qiyməti: 8-15 manat.
Azərbaycan Dövlət Yuğ Teatrında (Kukla Teatrının binasında): Martın 28-də saat 19:00-da Cəlil Məmmədquluzadənin "Çay dəsgahı" adlı pyesi əsasında "Toy dəsgahı" tamaşası oynanılacaq. Biletlərin qiyməti 5-15 manatdır.
Martın 29-da saat 19:00-da İmadəddin Nəsiminin 650 illiyinə həsr olunan "Mənəm, mən..." mistik-psixoloji dramı oynanılacaq. Quruluşçu rejissor Əməkdar incəsənət xadimi Mehriban Ələkbərzadədir. Biletlərin qiyməti: 5-15 manat.
Heydər Əliyev Sarayı: Martın 27-də saat 20:00-da "Anna Karenina" tamaşası göstəriləcək. Tamaşanın quruluşçu rejissoru Gjorgji Rizeskidir. Biletlərin qiyməti: 15-200 manat.
Martın 27-də saat 20:00-da "Tynda Music"in "Köhnə kinonun mehriban mahnıları" konserti. Biletlərin qiyməti: 30-300 manat.