"Mançester Siti"də baş məşqçi dəyişikliyi: Qvardiola öz xələfini seçdi

"Mançester Siti" klubunun sükanı arxasına keçəcək yeni mütəxəssis müəyyənləşib. Oxu.Az-ın "Topskills Sports UK" nəşrinə istinadla yaydığı məlumata görə, cari mövsüm başa çatdıqdan sonra Xosep Qvardiola postunu tərk edəcək və onun yerini Entso Mareska tutacaq. "Şəhərlilər" italiyalı çalışdırıcı ilə beş il müddətinə nəzərdə tutulan sözləşmə hazırlayıblar. Bu sazişin ispan mütəxəssisin işini yekunlaşdırmasının ardınca rəsmiləşdirilməsi gözlənilir. Yayılan xəbərlərə əsasən, Qvardiola Mareskanı özünə ən uyğun xələf sayır və rəhbərliyə məhz onu məsləhət görüb. Xatırladaq ki, Qvardiolanın klubla hazırkı anlaşması növbəti mövsümün sonuna qədər qüvvədədir. Buna baxmayaraq, mətbuatda yer alan iddialar ispan məşqçinin bu yay komanda ilə vidalaşma ehtimalının yüksək olduğunu göstərir.