Argentina və ABŞ kritik vacib minerallar üzrə saziş imzaladılar

Argentina və ABŞ kritik vacib mineralların hasilat və emal üçün tədarüklərini gücləndirmək barədə razılaşma çərçivə sazişi imzalayıblar. Oxu.Az-ın xarici KİV-ə istinadən xəbərinə görə, bu barədə Argentina Xarici İşlər Nazirliyindən məlumat verilib. Məlumata görə, imzalanma Vaşinqtonda ABŞ dövlət katibi Marko Rubio tərəfindən çağırılan kritik vacib minerallar üzrə nazirlər görüşü zamanı baş tutub. Bildirilir ki, saziş iki ölkə arasında strateji tərəfdaşlığı və onların etibarlı, dayanıqlı və rəqabətədavamlı tədarüklərin inkişaf etdirilməsi üzrə öhdəliyini təsdiqləyir. Argentina Xarici İşlər Nazirliyinin məlumatına görə, saziş daha dayanıqlı və şaxəli dəyər zəncirlərinin gücləndirilməsinə, uzunmüddətli istehsal investisiyaları üçün əlverişli şəraitin yaradılmasına və artan qlobal tələbatın ödənilməsinə, eləcə də qabaqcıl texnologiyaların tətbiqinə yönəlib. Argentinanın nöqteyi-nəzərindən saziş ölkənin kritik vacib minerallar seqmentindəki mövqeyinin gücləndirilməsi üzrə daha geniş strategiyanın bir hissəsidir. Proqnozlara görə, növbəti yeddi il ərzində ixracın ümumi həcmi təxminən 100 milyard dollara çatacaq, eyni zamanda, dağ-mədən sənayesinin payının artacağı gözlənilir. Bu dövr ərzində sektorun həcmi 20 milyard ABŞ dollarını, növbəti onilliyin sonuna qədər isə potensial olaraq 30 milyard ABŞ dollarını keçə bilər.