NBC: Merilend ştatında afroamerikalılara kompensasiya verilməsi müzakirə olunacaq

ABŞ-nin Merilend ştatında afroamerikalılara köləlik illəri üçün potensial kompensasiyaların verilməsini araşdırmaq üçün xüsusi komissiya yaradılacaq. Oxu.Az xəbər verir ki, bu barədə NBC telekanalı məlumat yayıb. Telekanalının məlumatına görə, ştat qanunvericiləri ABŞ-də yeganə afroamerikalı qubernator kimi uzun müddətdir bu təşəbbüsə qarşı çıxan Ues Murun vetosunu ləğv ediblər. NBC bildirib ki, U.Mur "köləlik irsinin artıq kifayət qədər öyrənildiyini" düşünür, lakin Merilend qanunvericilik orqanının hər iki palatasına nəzarət edən demokratlar məsələni daha dərindən araşdırmaq üçün xüsusi komissiyaya ehtiyac olduğunu düşünürdülər. Afroamerikalılar rəsmi hökumətdən üzrxahlıqla yanaşı, pul kompensasiyası, əmlak vergisinin götürülməsi, mənzil və biznes güzəştləri, borcların bağışlanması və pulsuz kollec təhsili kimi imtiyazlar ala bilərlər. Merilend sakinlərinin 30 faizini afroamerikalı təşkil edir. 2021-ci ildə İllinoys ştatının Evanston şəhəri keçmişdə təqibə və ayrı-seçkiliyə məruz qalan afroamerikalı ailələr üçün ABŞ-də güzəştlər tətbiq edən ilk şəhər olub.