"Panasonic Avionics" və Azərbaycan Hava Yolları sərnişin təcrübəsini təkmilləşdirmək üçün innovativ həllər tətbiq edir - Foto

"Panasonic Avionics" və Azərbaycan Hava Yolları (AZAL) bortdaxili xidmətlərin müasirləşdirilməsi çərçivəsində əməkdaşlığı davam etdirərək müasir əyləncə texnologiyalarını və sərnişinlərlə rəqəmsal qarşılıqlı əlaqə imkanlarını tətbiq edir. Oxu.Az xəbər verir ki, "Panasonic Avionics" şirkətinin 4 iyun 2026-cı il tarixli rəsmi press-relizində bildirildiyi kimi, Azərbaycan Hava Yollarının "Airbus A320neo" ailəsinə aid təyyarələrində "Astrova" bortdaxili əyləncə sistemi və "Modular Interactive" (MI) rəqəmsal platforması kommersiya istismarına verilib. Bu həllərin ümumilikdə Azərbaycan Hava Yollarının 22 hava gəmisində tətbiqi nəzərdə tutulur. "Astrova" sistemi sərnişinlərə 4K OLED HDR10+ təsvir keyfiyyətinə malik fərdi ekranlarda əyləncə məzmunundan istifadə etmək, qulaqlıqları "Bluetooth" vasitəsilə qoşmaq, həmçinin elektron cihazlarını 67 Vt-dək enerji ötürmə gücünə malik USB-C portları vasitəsilə şarj etmək imkanı yaradır. "Modular Interactive" platforması bortdaxili əyləncə sisteminin interfeysini aktual hadisələrə və sərnişinlərin maraqlarına uyğunlaşdıraraq operativ şəkildə yeniləməyə imkan verir. Belə ki, Bakıda keçirilən yarış həftəsi ərzində Azərbaycan Hava Yolları "Panasonic Avionics" ilə birgə 24 saatdan az müddətdə yarış mövzusunda yenilənmiş interfeys hazırlayıb və onu cəmi bir neçə saat ərzində təyyarələrdə tətbiq edib. MI platformasının çevikliyi aviaşirkətlərə uzunmüddətli proqram təminatı hazırlığına ehtiyac olmadan tematik yenilikləri, reklam kampaniyalarını və fərdiləşdirilmiş məzmunu qısa müddətdə istifadəyə verməyə imkan yaradır. Bu isə sərnişinlər üçün aktual və fərdi uçuş təcrübəsinin formalaşdırılması istiqamətində əlavə imkanlar açır. "Panasonic Avionics" ilə əməkdaşlıq Azərbaycan Hava Yollarının innovasiyaların tətbiqinə, bortda rahatlıq səviyyəsinin artırılmasına və sərnişinlərə səyahət boyu müasir rəqəmsal həllərin təqdim edilməsinə verdiyi önəmi əks etdirir.
{{gallery}}