"Mançester Siti" ətrafında 40 milyardlıq diplomatik gərginlik: Qalmaqal hüdudları aşdı

İngiltərə Premyer Liqası tarixində ən genişmiqyaslı maliyyə qayda pozuntusu araşdırmasında "Mançester Siti" klubunun üzləşə biləcəyi sanksiyalar, London və Əbu-Dabi münasibətlərində diplomatik gərginliyə səbəb olub. Oxu.Az "Haber Global"a istinadən xəbər verir ki, Birləşmiş Ərəb Əmirliklərinin (BƏƏ) Böyük Britaniyadakı 40 milyard dollarlıq nəhəng sərmayələrinin gələcəyi məhkəmənin çıxaracağı qərardan asılı vəziyyətə düşüb. Premyer Liqa rəhbərliyi ilə "Mançester Siti" arasında davam edən, 114 ayrı maliyyə qaydasının pozulmasını ehtiva edən məhkəmə prosesi həm futboldakı vəziyyətə, həm də beynəlxalq siyasət və iqtisadiyyata ciddi təsir göstərib. Müstəqil komissiyanın yekun qərar ərəfəsində olduğu bu iş, Britaniya hökuməti ilə BƏƏ arasında mövcud olan 40 milyard dollarlıq investisiyaların kölgəsində qalıb. BƏƏ rəsmiləri "Mançester Siti" cəzalandırılacağı təqdirdə, Britaniyadakı bəzi layihələrini dayandırmaq variantını nəzərdən keçirəcəklərini açıq şəkildə ifadə ediblər. 40 milyardlıq sərmayə geri götürüləcək? İddialara görə, "Mançester Siti"nin xallarının silinməsi, çempionluq titullarının əlindən alınması və ya Premyer Liqadan uzaqlaşdırılması kimi sərt cəzalar tətbiq olunarsa, Əbu-Dabi təmsilçiləri Britaniyadakı nəhəng yatırımlarına yenidən baxacaqlar. BƏƏ-nin Birləşmiş Krallıq ərazisində texnologiya, infrastruktur və daşınmaz əmlak sahələrində ümumi dəyəri 40 milyard dollar olan layihələri mövcuddur. Ekspertlərin fikrincə, Britaniyanın Yaxın Şərqdəki ən böyük ticarət tərəfdaşı olan BƏƏ ilə əlaqələri sadəcə iqtisadiyyatla məhdudlaşmır. Qeyd olunur ki, BƏƏ 2024-cü ildən etibarən Britaniyadan ən çox silah alan üçüncü dövlətdir və iki ölkə arasındakı hərbi müqavilələrin həcmi 1.3 milyard dollara çatır. "Mançester Siti"nin sahibi Şeyx Mansur bin Zayed Ən Nəhyan klubun mütləq şəkildə fərdi sərmayə olduğunu və BƏƏ dövləti tərəfindən birbaşa dəstəklənmədiyini iddia edir. Buna baxmayaraq, Britaniyanın Baş naziri Endi Börnhemin son vaxtlar BƏƏ-dən ölkəsinə daha çox sərmayə cəlb etmək istiqamətində addımlar atdığı və məhkəmənin gedişatının baş nazirin siyasətinə birbaşa təsir göstərə biləcəyi vurğulanır. Qeyd olunub ki, Britaniyanın BƏƏ ilə təhlükəsizlik, ticarət və investisiya əlaqələri son dərəcə həssas xarakter daşıyır və dövlətin müxtəlif qurumları hazırkı vəziyyətdən narahatlıq keçirir. "Bloomberg" agentliyi yazır ki, BƏƏ-nin mümkün təzyiqlərinə təslim olaraq qərarların qəbul edilməsi və ya cəmiyyətdə bu cür təəssürat yaradacaq addımların atılması Britaniya üçün daha acınacaqlı nəticələrə gətirib çıxaracaq. Qeyd olunur ki, bu yanaşma gələcəkdə kifayət qədər siyasi və maliyyə gücü olan hər kəsin qaydaları poza biləcəyi fikrini formalaşdıracaq. Məhz buna görə də, rəsmi London qərarların tam müstəqil qəbul edildiyini bütün tərəflərə nümayiş etdirməlidir. "Sky Sports" məlumat yayıb ki, UEFA "Mançester Siti" ətrafında cərəyan edən prosesləri diqqətlə izləyir və Premyer Liqadakı intizam işi yekunlaşdıqdan sonra elan ediləcək qərara əsasən öz addımlarını müəyyənləşdirəcək. "Mançester Siti" üçün hansı cəzalar nəzərdə tutulub? "Mançester Siti"yə qarşı tətbiq oluna biləcək ehtimal edilən sanksiyalar bunlardır: - Premyer Liqadan aşağı liqaya göndərilmə: Ən sərt cəza növü kimi gündəmdədir. - Rekord səviyyədə xal silinməsi: Cari və ya əvvəlki mövsümlərə təsir edəcək tarixi xal cəzaları. - Çempionluq titullarının ləğvi: Qaydaların pozulduğu illərdə qazanılmış kubokların geri alınması. - Yüksək məbləğli cərimələr və transfer qadağası: Klubun iqtisadi fəaliyyətini məhdudlaşdıracaq qərarlar. Beləliklə, futbol tarixinin ən mürəkkəb və böyük büdcəli məhkəmə işindən çıxacaq qərar, yalnız "Mançester Siti"nin gələcəyini deyil, həm də Britaniya ilə BƏƏ arasındakı milyard dollarlarla ticarət əlaqələrinin sonrakı istiqamətini həll edəcək.