Dələduzluqda təqsirləndirilən sabiq baş konsulun məhkəməsində NƏ BAŞ VERDİ?

Dələduzluqda ittiham olunan Azərbaycanın Sankt-Peterburqdakı sabiq baş konsulu Sultan Qasımovun cinayət işi üzrə növbəti məhkəmə prosesi keçirilib. Oxu.Az-ın məlumatına görə, Bakı Ağır Cinayətlər Məhkəməsində hakim Firdovsi Əliyevin sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib. Daha sonra Sultan Qasımovun vəkili müvəkkilinin hüquqlarının pozulduğunu əsas gətirərək cinayət işinin ibtidai istintaqa qaytarılması barədə vəsatət verib. Zərərçəkmiş Anton Zayatsın vəkili də vəsatətlə çıxış edərək təqsirləndirilən şəxs barəsində həbs qətimkan tədbirinin seçilməsini istəyib. Vəkil bildirib ki, təqsirləndirilən şəxs şahidlərin ifadələrinə təzyiq göstərə bilər. Həmçinin qeyd edib ki, zərərçəkmişə 191 min manatdan çox ziyan vurulub və həmin vəsaitin ödənilməsi istiqamətində təşəbbüs göstərilməyib. Vəkil həbs qətimkan tədbirinin seçilməsi məsələsinə hazırkı mərhələdə baxılmasını istəyib. Daha sonra hakim hazırlıq iclasının qərarını açıqlayıb. Qərara əsasən, vəsatətlər təmin edilməyib və cinayət işi məhkəmə baxışına verilib. Məhkəmə baxışı oktyabrın 13-nə təyin olunub. İttihama görə, sabiq baş konsul Sultan Qasımov barəsində cinayət işi Baş Prokuror yanında Korrupsiyaya Qarşı Baş Mübarizə İdarəsində araşdırılıb. Məlum olub ki, zərərçəkmişlərə 200 min manatdan çox məbləğdə ziyan dəyib. Anton Zayats və Faiq Mikayılov zərərçəkmiş qismində tanınıblar. Ümumi ziyanın bir hissəsi istintaq dövründə ödənilib. İstintaqın məlumatına görə, Sultan Qasımov Rusiyada yaşayan vətəndaşa torpağı hərrac yolu ilə alacağı barədə vəd verib. Bundan əlavə, digər zərərçəkmişə qızılı hava yolu ilə başqa ölkəyə keçirəcəyini bildirib. Ona Cinayət Məcəlləsinin 12.1. və 178.3.2-ci maddələri ilə ittiham irəli sürülüb. Sultan Qasımov 2009-cu ildə Rusiya Federasiyasının Yekaterinburq şəhərində Azərbaycanın ilk baş konsulu təyin olunub və 2016-cı ildə bu vəzifədən geri çağırılıb. Həmin il mayın 3-də Azərbaycanın Sankt-Peterburq şəhərində baş konsul vəzifəsinə təyin edilib. O, 2024-cü il oktyabrın 21-də bu vəzifədən geri çağırılıb. Bu təyinat və geri çağırılma tarixləri Oxu.Az-ın əvvəlki materialında da eyni şəkildə göstərilib. Sultan Qasımov Azərbaycan Prezidentinin keçmiş mətbuat katibi Azər Qasımovun qardaşıdır. Azər Qasımov 2025-ci ildə vəzifəsindən azad edilib. Elgün Həsənli