Tramp süni intellektin bəşəriyyəti məhv edəcəyinə inanmır

ABŞ Prezidenti Donald Tramp süni intellektin tənqidçilərini mümkünsüz ssenariləri gündəmə gətirən "çox mənfi qüvvələr" adlandırıb. Oxu.Az "Reuters"ə istinadən xəbər verir ki, Tramp bunu İrlandiyadakı qolf meydançasında jurnalistlərin süni intellekt sənayesinin inkişafının yavaşladılmalı və ya daha çox tənzimlənməli olub-olmaması barədə sualına cavabında deyib. "Biz süni intellekt sahəsində Çini qabaqlayırıq. Dünyanın ən qabaqcıl ölkəsiyik və açığı, bunun belə qalmasını istəyirəm, çünki süni intellektdə qalib gələn ümumi qalib gəlir", - deyə Tramp bildirib. "Biz məhdudiyyətlər qoya bilərik. Bunu və ya digərini edə bilərik. Amma düşünürəm ki, çoxlu çox mənfi qüvvələr var. Onlar gündəmə gətirilməməli olan məsələləri gündəmə gətirirlər və baş verməyəcək şeylərdən danışırlar", - deyə Tramp bildirib. ABŞ-də süni intellektlə bağlı ictimai müzakirələr "Anthropic" şirkətinin iki tədqiqatçısının sürətlə inkişaf edən texnologiyanın o qədər də uzaq olmayan gələcəkdə bəşəriyyətin məhvinə səbəb ola biləcəyi barədə xəbərdarlıq etməsindən sonra qızışıb. Trampın ikinci prezidentlik müddətində administrasiyası, əsasən, süni intellekt şirkətlərini dəstəkləyib. Bu şirkətlərin rəhbərləri və digər texnologiya şirkətləri də Trampın təşəbbüslərini alqışlayıblar.