ABŞ-İran danışıqları dayandırılır - İddia

ABŞ və İran arasında bu həftə sonu İsveçrədə bərpa edilməsi planlaşdırılan danışıqlar, gərginliyin artması və tərəflər arasında qarşılıqlı hücumların yenidən başlaması səbəbindən təxirə salınıb.

Axar.az xəbər verir ki, bu barədə "Vol Strit Jurnal" qəzeti mənbələrə istinadən məlumat yayıb.

Məlumata görə, son günlərdə hərbi toqquşmaların artması danışıqlar mühitinə ciddi şəkildə təsir göstərib və diplomatik prosesin davam etdirilməsinə mane olub.

Tərəflər daha əvvəl ilkin razılaşma çərçivəsində danışıqları davam etdirməyə və gərginliyi azaltmağa hazır olduqlarını bəyan etmişdilər, lakin son hadisələr bu danışıqların perspektivini ciddi qeyri-müəyyənliklə üz-üzə qoyub.

Məlumatlı mənbələrin bildirdiyinə görə, bu danışıqların bərpası üçün hələlik dəqiq bir vaxt elan edilməyib və diplomatik prosesin davamı real şəraitdən və gərginliyin azalmasından asılıdır.