Vuçiçin həyatı təhlükədədir - Xəbərdarlıq edildi
Serbiyanın Təhlükəsizlik və İnformasiya Xidməti Prezident Aleksandr Vuçiçə Monteneqroda keçiriləcək AB-Qərbi Balkan sammitinə səfər edəcəyi təqdirdə həyatının təhlükə altına düşəcəyi barədə xəbərdarlıq edib.
Axar.az xəbər verir ki, bu barədə Serbiyanın Təhlükəsizlik və İnformasiya Xidməti məlumat yayıb.
Qurumun açıqlamasında bildirilib ki, qərar Monteneqrodakı xarici kəşfiyyat xidmətləri və cinayətkar klanların düşmənçilik hərəkətləri ilə əlaqədardır.
“Kavaçki” cinayətkar klanının başçısı Radoje Zvitser Monteneqrodadır. Yüksək təhlükəsizlik riski müəyyən edilib. Bütün peşəkar və məsuliyyətli davranışlara zidd olaraq, Monteneqroda görüşü keçirən xidmətdən dəfələrlə tələb olunan təhlükəsizlik qiymətləndirməsi bizə təqdim edilmədi”, - məlumatda vurğulanıb.
Qeyd edək ki, "Kavaçki" cinayətkar qruplaşmasının lideri Radoje Zvitser, 2026-cı ilin iyun ayına olan məlumata görə, Monteneqroda yaşayır. Qanunsuz fəaliyyəti ilə əlaqədar Zvitserə ondan çox cinayət işi açılıb. Zvitser İnterpolun orderi ilə beynəlxalq axtarışdadır.
