Türkiyədə MİT-dən casusluq şəbəkəsinə ağır zərbə

Türkiyə Milli Kəşfiyyat Təşkilatı (MİT) Türkiyə əleyhinə kəşfiyyat fəaliyyəti ilə məşğul olan beynəlxalq casus şəbəkəsini çökdürüb. Bu barədə Oxu.Az "Haber Global"a istinadən xəbər verir. Məlumata görə, MİT iki fərqli xarici xidmətə işləyən və casusluq şəbəkəsində yer alan 9 şəxsi müəyyən edib. Dörd bölgədə eyni vaxtda əməliyyatlar təşkil edilib və şəbəkənin rəhbəri daxil olmaqla, 7 nəfər saxlanılıb. Qruplaşmanın 2 üzvünün isə artıq digər cinayətlərə görə həbsxanada olduğu məlum olub. Ələ keçən 7 nəfər barəsində həbs qərarı çıxarılıb. Casusluq şəbəkəsinin rəhbəri və digərlərinin Türkiyədəki vətəndaş cəmiyyəti təşkilatları, dərnəklər, etnik qruplar və dövlət məmurları haqqında həssas məlumatları toplayaraq xarici kəşfiyyat xidmətlərinə ötürdükləri məlum olub.