Böyük Britaniyanın baş naziri istefa verir?

Böyük Britaniyanın Baş naziri Kir Starmer könüllü olaraq Böyük Mançesterin meri Endi Bernemin xeyrinə öz vəzifə səlahiyyətlərindən imtina edə bilər. Oxu.Az-ın xəbərinə görə, bu barədə "The Daily Telegraph" nəşri məlumat verib. Mayın 14-də Bernem bəyan etmişdi ki, İngiltərənin şimalındakı Meykerfild seçki dairəsindən Britaniya Parlamentinin İcmalar Palatasının (Aşağı Palata) məhəlli seçkidə namizədliyini irəli sürəcək. Mayın 15-də hakim Leyborist Partiyasının milli icra komitəsi onun namizədliyini təsdiqləyib. Məhəlli seçkinin iyunun 18-də keçirilməsi gözlənilir ki, bu da Meykerfildi təmsil edən hazırkı leyborist deputat Coş Simonsun Bernemin parlamentə daxil olmasına imkan yaratmaq üçün istefa verdiyini elan etməsi ilə əlaqəlidir. Seçkidə qalib gələrsə, Bernem Böyük Britaniyanın baş naziri postuna namizəd ola biləcək. Birləşmiş Krallıqdakı bütün yüksəkvəzifəli hökumət üzvləri parlamentarilərdir. "The Daily Telegraph"ın mənbələrinin məlumatına görə, Starmer "bütün variantları" nəzərdən keçirir və özünün liderliyinə meydan oxuya biləcək istənilən cəhdləri dəf etməyə hazır olduğunu açıq şəkildə bəyan etməsinə baxmayaraq, könüllü şəkildə istefa verə bilər. Belə bir ssenari o halda mümkündür ki, Leyborist Partiyası daxilindəki müxtəlif qruplaşmalar Bernem fiquru ətrafında birləşsinlər. Eyni zamanda, qeyd olunur ki, Starmer məhəllə seçkisində Meykerfildin nəticələri məlum olana qədər istefa verməyəcək. Həmçinin bildirilir ki, hakim partiyanın artıq 90-dan artıq deputatı Starmerin getməsinin lehinə danışıb. Mayın 15-də ölkənin səhiyyə naziri Uez Stritinq istefa verib və bəyan edib ki, buna səbəb Starmerə olan etibarın itirilməsidir. KİV Stritinqi Starmeri devirməyə cəhd edə biləcək şəxslərdən biri kimi qeyd edir.