CENTCOM-dan ABŞ gəmisinin vurulmasına REAKSİYA

İran tərəfindən həyata keçirilən hücumlar zamanı ABŞ-yə məxsus heç bir gəmiyə ziyanın dəymədiyi bildirilib. Oxu.Az xəbər verir ki, bu məlumatı Amerika Birləşmiş Ştatlarının Mərkəzi Komandanlığı (CENTCOM) rəsmən təsdiqləyib. "ABŞ Hərbi Dəniz Qüvvələrinə aid heç bir gəmi hədəfə tuş gəlməyib. ABŞ-nin hərbi bölmələri "Azadlıq layihəsi" adlı əməliyyatın icrasını davam etdirir və İran limanlarına qarşı dəniz blokadasını həyata keçirir", - deyə komandanlığın "X" platformasında yerləşdirilən bəyanatında qeyd olunub. 15:14 Amerika Birləşmiş Ştatlarının Hərbi Dəniz Qüvvələrinə aid freqatın iki raket zərbəsinə məruz qaldığı iddia edilir. Oxu.Az xəbər verir ki, bu barədə "Fars" agentliyi məlumat yayıb. Məlumata əsasən, ABŞ hərbi gəmisi Hörmüz boğazı istiqamətində, Cask bölgəsi yaxınlığında olarkən İran tərəfinin xəbərdarlığına məhəl qoymayıb. Nəticədə həmin freqatın hədəfə çevrildiyi qeyd olunur. Xəbərdə vurğulanır ki, raket hücumundan sonra gəmi geri dönərək həmin bölgədən uzaqlaşmaq məcburiyyətində qalıb. Xatırladaq ki, bir müddət öncə İran Silahlı Qüvvələrinin mərkəzi komandanlığı olan "Xatəm əl-Ənbiya" qərargahı ABŞ hərbçilərinin Hörmüz boğazına girməsi halında zərbəyə məruz qalacaqları barədə xəbərdarlıq etmişdi. Paralel olaraq, ABŞ Prezidenti Donald Tramp da öz ordusunun bağlanmış su yollarında gəmiləri qoruyacağını və sözügedən missiyanın "Project Freedom" adlandırıldığını bəyan etmişdi. Rəsmi Tehran isə regiondakı təhlükəsizlik vəziyyətini tam olaraq idarə edəcəyini, başda ABŞ ordusu olmaqla bütün xarici hərbi qruplaşmalara qarşı ciddi addımlar atacağını diqqətə çatdırmışdı.