Moda eksperti Vladislav Lisovets yaradıcılıq planlarından və gündəlik həyatından danışıb

Tanınmış moda eksperti, həmçinin televiziya və radio aparıcısı Vladislav Lisovets şəxsi gözəllik salonunda yenidənqurma işləri apardığını bildirib. Oxu.Az xəbər verir ki, moda eksperti bu barədə NEWS.ru nəşrinə müsahibəsində məlumat verib. Stilist hər beş ildən bir əhatə olunduğu mühiti yeniləməyi adət halına saldığını vurğulayıb. O, asudə vaxtlarında sevdiyi şəhəri daha yaxından tanımaq məqsədilə tez-tez gəzintiyə çıxdığını diqqətə çatdırıb. Aparıcı müştərilərinə peşəkar məsləhətlər verməyi də davam etdirir: "Hazırda salonumun dizaynını yeniləyirəm, təmir prosesi gedir. Mənim əsas prinsipim yaşadığım mənzili və iş məkanımı hər beş ildən bir dəyişməkdir. Şəhəri öyrənmək və yeni insanlarla ünsiyyət qurmaq üçün gəzintilərə çox vaxt ayırıram. Həmçinin saç kəsimi və ümumi stil barədə müştərilərimə xidmət göstərirəm, insanlarla daimi və sıx təmasdayam", - deyə V.Lisovets bildirib. Ekspert əlavə edib ki, may ayındakı istirahət günlərində Venesiya Müasir İncəsənət Biennalesinə yollanmaq niyyətindədir. Bununla yanaşı, V.Lisovets velosiped və mopeddən istifadə etmək üçün havaların isinməsini səbirsizliklə gözlədiyini ifadə edib. O, mütəmadi olaraq sərgilərdə iştirak etdiyini və onlardan böyük ilham aldığını sözlərinə əlavə edib. Sonda Lisovets fikirlərini bu cür tamamlayıb: "Bütövlükdə, çox fəal və ilham dolu bir həyat tərzi seçmişəm. Yaş öz işini görür, bunun mənfi təsirlərindən qorunmaq üçün isə hər zaman hərəkətdə qalmaq lazımdır".