Süni intellektin absurd videoları: Niyə onlara baxmaqdan özümüzü saxlaya bilmirik?

İnternet məkanında süni intellektin köməyi ilə hazırlanan qeyri-adi və absurd videoların sayı sürətlə artır. Bu kadrlarda meyvələr, tərəvəzlər və ya müxtəlif məişət əşyalarının insanlara xas hərəkətlər etdiyi müşahidə olunur. Oxu.Az məlumat verir ki, Novosibirsk Dövlət Pedaqoji Universitetinin mütəxəssisi, psixoloq Daria Radionova bu cür kontentin populyarlığının əsas səbəbini onun məntiqsizliyində görür. Gündəlik həyatdan tanıdığımız əşyaların qəflətən insani xüsusiyyətlər qazanması həm komik, həm qəribə, həm də müəyyən mənada təşvişedici hisslər oyadaraq istifadəçilərin diqqətini dərhal cəlb edir. Psixoloqun sözlərinə görə, bu videoların geniş yayılmasına bir neçə faktor təsir göstərir: Uyğunsuzluq effekti: Adi detalların gözlənilməz reaksiyaları izləyicidə təbii maraq yaradır. Serial təsiri: Süjetin maraqlı yerdə kəsilməsi izləyicidə növbəti hissəyə baxmaq arzusu formalaşdırır. Rəngarəng vizuallar: Aydın və rəngarəng görüntülər bütün yaş kateqoriyaları tərəfindən asanlıqla qəbul edilir. Süni intellekt tərəfindən formalaşdırılan bu səhnələrdə xəyanət, münaqişə və ailə dramı kimi mövzuların əks olunması onlara daha çox "insani" xarakter qazandırır. Mövcud trend rəqəmsal platformalarda yeni yumor növü kimi qiymətləndirilir və artıq kommersiya şirkətləri tərəfindən reklam məqsədləri üçün də istifadə olunur. Daria Radionova vurğulayır ki, bu videolar izləyicilərə gündəlik həyatın gərginliyindən müvəqqəti xilas olmağa imkan yaradır. Məzmunun yüngül emosional fonu, sadəliyi və anlaşıqlı olması onu auditoriya üçün daha da cəlbedici edir. Bütün bunlarla yanaşı, mütəxəssis xəbərdarlıq edir: əgər bu videolar dincəlməyin yeganə üsuluna çevrilərsə, insan beyni yalnız bəsit və sürətli informasiyalara öyrəşəcək, nəticədə isə mürəkkəb məlumatların dərk edilməsi çətinləşəcək. Psixoloqun qənaətinə görə, belə kontentlərə zaman-zaman baxmaq zərərsiz olsa da, bu prosesdə mütləq tarazlıq saxlanılmalıdır.