Gürcüstanın keçmiş müdafiə naziri 10 il müddətinə azadlıqdan məhrum edildi

Tbilisi Şəhər Məhkəməsi Gürcüstanın keçmiş müdafiə naziri Cuanşer Burçuladzeyə 10 il müddətinə həbs cəzası kəsib. O, çirkli pulların yuyulmasında və vəzifə səlahiyyətlərindən sui-istifadədə təqsirli bilinib. Oxu.Az bu barədə "Rustavi-2" telekanalına istinadən xəbər verir. "Məhkəmə keçmiş müdafiə naziri Cuanşer Burçuladzeni, onun keçmiş müavini Georgi Xayndravanı, Burçuladzenin həyat yoldaşının kürəkəni Vasil Mxeidzeni və Müdafiə Nazirliyinin satınalma şöbəsinin keçmiş rəisi Vladimir Quduşaurini təqsirli bilib", - deyə məlumatda bildirilir. İşin fiqurantları V.Mxeidze və G.Xayndrava hər biri səkkiz il müddətinə azadlıqdan məhrum ediliblər. Keçmiş nazirin əmlakı da müsadirə olunacaq. Xatırladaq ki, Gürcüstan məhkəməsi 13 sentyabr 2025-ci il tarixində hakimiyyətdən sui-istifadə və qanunsuz gəlirlərin leqallaşdırılmasında ittiham olunan, ölkənin eks-müdafiə naziri C.Burçuladzeni həbs etmişdi. Qeyd olunurdu ki, o, 2023-cü ildə hərbi hospitalı 1,4 milyon dollar əvəzinə, dəyəri 966 min dollardan çox olan avadanlıqla təmin edib. Bu zaman nazirliyə dəyən ziyan 483 min dollardan çox olub. Bundan əlavə, həmin il o, həyat yoldaşı ilə birlikdə İspaniyada daşınmaz əmlak alıb və əmlakın mənşəyini gizlətmək üçün Tsxnetidə saxta alqı-satqı müqaviləsi imzalayıb.