Viktor Osimhen İngiltərə nəhənginə çağırıldı

İngiltərənin "Mançester Yunayted" klubunun əfsanəvi adlarından olan sabiq futbolçu Nikki Batt hazırda Türkiyənin "Qalatasaray" komandasının şərəfini qoruyan Viktor Osimhen barədə diqqətçəkən açıqlama verib. Oxu.Az xəbər verir ki, keçmiş futbolçu nigeriyalı qoleadorun "qırmızı şeytanlar" üçün ən ideal transfer hədəfi olduğunu bildirərək onu birbaşa kluba dəvət edib. Sabiq yarımmüdafiəçi klub rəhbərliyinə səslənərək, reallaşması çətin və fantastik məbləğlər tələb edən futbolçulara vaxt xərcləməyin yersiz olduğunu qeyd edib və bu sözləri söyləyib: "Onu "Mançester Yunayted"ə dəvət edirəm. Viktor Osimhen mütləq şəkildə ən doğru seçimdir. O, kifayət qədər güclü, sürətli, rəqib müdafiəçilərin arxasına asanlıqla sızmağı bacaran və hava mübarizələrində mükəmməl olan bir hücumçudur". Xatırladaq ki, Viktor Osimhen cari mövsüm ərzində "Qalatasaray"ın heyətində meydana çıxdığı 29 rəsmi qarşılaşmada 19 dəfə fərqlənməklə və 7 məhsuldar ötürmə verməklə möhtəşəm oyun qrafiki sərgiləməyə nail olub.