Cənubi Koreyada dərmanla silsilə qətllər törədən gənc qadının cinayət işi böyüyür

Cənubi Koreyada silsilə qətllər törədən 21 yaşlı Kimin törətdiyi cinayətlər nəticəsində ölənlərin sayının beş nəfərə yüksəlməsi ehtimal olunur. Oxu.Az-ın verdiyi məlumata əsasən, bu xəbəri yerli "JoongAng Ilbo" nəşri yayımlayıb. İstintaq gedişatında bu rezonanslı işlə bağlı yeni ehtimal olunan epizodlar üzə çıxıb. Ən erkən qeydə alınan hadisə 2025-ci il oktyabrın 25-nə aiddir. Həmin gün şübhəlinin telefon nömrəsindən təcili yardım xidmətinə zəng daxil olub. Zəng edən şəxs yoldaşının restoranda spirtli içki qəbul etdikdən sonra huşunu itirdiyini söyləyib. Bənzər bir hadisə 2026-cı ilin yanvarında karaoke klubunda qeydə alınıb. Hazırda hüquq-mühafizə orqanları bu iki faktın əvvəllər aşkar edilmiş üç cinayət epizodu ilə əlaqəli olub-olmadığını dəqiqləşdirir. Kim fevralın 19-da silsilə qətllərdə şübhəli qismində saxlanılıb. İlkin məlumatlara görə, zərərçəkənlərin sayı üçə çatıb, lakin araşdırmalar nəticəsində məlum olub ki, o, 2025-ci ilin dekabrından 2026-cı ilin fevralına qədər müddətdə moteldə üç kişiyə tərkibində qadağan edilmiş maddələr olan başağrısı əleyhinə dərmanlar verib. Nəticədə iki nəfər həyatını itirib, biri isə ciddi xəsarət alıb. Saxlanılan şəxsə qarşı qəsdən adam öldürmə, ağır bədən xəsarəti yetirmə və narkotiklərə nəzarət qanununu pozma maddələri ilə ittiham irəli sürülüb. Onun kimliyi rəsmi orqanlar tərəfindən açıqlanmasa da, internet istifadəçiləri onun profilini tapmağa nail olublar. O, xarici görünüşü səbəbindən qısa zamanda sosial şəbəkələrdə məşhurluq qazanıb, medianın məlumatına görə, qısa müddətdə onun abunəçilərinin sayı 8 min nəfəri keçib. İzləyicilər ona rəğbət bəslədiklərinə görə cinayətkar üçün həddindən artıq gözəl olduğunu bildiriblər.