Qanaxma, şişkinlik, nəfəs darlığı: Bəzi əlamətlər ağır xəstəlikdən xəbər verə bilər

"Dəridə şişkinliklər, bağırsaq tıxanıqlığı və tənəffüs çətinliyi xərçəngin inkişafından xəbər verə bilər". Oxu.Az xəbər verir ki, bu barədə TASS agentliyinə açıqlamasında rusiyalı akademik, onkoloq İvan Stilidi məlumat verib. Mütəxəssisin sözlərinə görə, əksər şiş xəstəliklərində erkən mərhələdə aydın simptomlar müşahidə olunmur: "Əksər hallarda xəstələri həkimə müraciət etməyə vadar edən əlamətlər şişin özündən deyil, onun yaratdığı ağırlaşmalardan qaynaqlanır. Bu ağırlaşmalara bağırsaq tıxanıqlığı, tənəffüs çətinliyi və ya şişin parçalanması nəticəsində baş verən qanaxmalar daxildir". Onkoloq xalların və dəri ləkələrinin ölçüsündə, rəngində və formasında baş verən dəyişikliklərin diqqətlə izlənilməsini tövsiyə edib. O vurğulayıb ki, bir çox hallarda xərçəng əlamətləri artıq müalicənin son dərəcə çətin olduğu gec mərhələdə üzə çıxır.