Əfsanəvi boksçu vəfat etdi

Boks üzrə argentinalı sabiq dünya çempionu Xorxe Kastro 59 yaşında dünyasını dəyişib. Oxu.Az "La Nación" nəşrinə istinadən xəbər verir ki, idmançının səhhəti Buenos-Ayres əyalətinin Moron şəhərində yerləşən mərc oyunları məkanında qəfildən pisləşib. Məlumata görə, "Lokomotor" ləqəbli sabiq məşhur idmançı oyun avtomatları zalında olub. Hadisə yerinə gələn həkimlər onun ölümünü təsdiqləyiblər. Hazırda hadisənin təfərrüatları araşdırılır və keçmiş idmançının vəziyyətinə şəkərli diabet xəstəliyinin təsir edib-etmədiyi öyrənilir. Qeyd edək ki, Kastro 1994-cü ildə ABŞ-li Redci Consona qalib gələrək Ümumdünya Boks Assosiasiyasının orta çəkidə dünya çempionu titulunu qazanıb. Onun karyerasının ən yaddaqalan anlarından biri elə həmin ilin dekabrında digər ABŞ-li boksçu Con Devid Ceksonla döyüşü olub. Həmin vaxt argentinalı boksçu ağır başlanğıcdan sonra görüşün gedişatını dəyişərək qələbə qazanmağı bacarmışdı. Son illərdə Xorxe Kastro ictimai fəaliyyətlə məşğul idi. O, Buenos-Ayres şəhərinin ətraf ərazilərindəki yeməkxanaları və qida paylanma məntəqələrini dəstəkləyirdi. Bundan əlavə, sabiq idmançı müxtəlif televiziya layihələrində, o cümlədən "MasterChef Celebrity" kulinariya şousunda iştirak edirdi.