Panamada daha bir güclü zəlzələ: Prezident xalqa müraciət etdi

Panamada, Sona şəhərinin 32 kilometr cənub-qərbində 6.4 maqnitudalı zəlzələ baş verib. Oxu.Az xəbər verir ki, bu barədə yerli qurumlar rəsmi məlumat yayıblar. Yeraltı təkanlar Bakı vaxtı ilə bu gün saat 03:20-də (yerli vaxtla oktyabrın 12-də saat 18:20) baş verib. Seysmoloji mərkəzin məlumatına əsasən, təkanların ocağı 5 kilometr dərinlikdə olub. Məlumata görə, baş vermiş güclü təkanlar 6 mindən artıq insana təsir etsə də, xəsarət alan və ölən olmayıb. Ölkə prezidenti Xose Raul Mulino vətəndaşlara ünvanladığı müraciətində bildirib: "İndiyədək 1 744 evə baxış keçirilib, 6 174 nəfərin zərər çəkdiyi müəyyənləşib. Yoxlamalar davam etdikcə bu göstəricilər yenilənəcək". Mulino zəlzələnin dağıdıcı təsirinin yüksək olduğunu və ekspertlərin ziyanın həcmini hesablamağa davam etdiyini vurğulayıb. Eyni zamanda, hökumət ərzaq, eləcə də içməli su təminatını həyata keçirir, elektrik enerjisinin bərpası, yol və körpülərin təmiri ilə məşğul olur. "Kömək və dəstəyə daha çox ehtiyacı olanlara yardımların çatdırılması üçün zəruri resursları əsirgəməyəcəyəm", - deyə prezident bəyan edib. Sosial şəbəkələrdə sunami təhlükəsi və Panama kanalı üzərində yerləşən ABŞ körpüsünün bağlanması ilə bağlı yayılan saxta xəbərlərə münasibət bildirən Mulino əlavə edib: "Buna bənzər heç bir hadisə yaşanmayıb, yayılan məlumatlar isə sadəcə yersiz təşviş və gərginlik yaradıb". Xatırladaq ki, oktyabrın 9-da Avropa-Aralıq dənizi Seysmoloji Mərkəzi Panamada yerli vaxtla saat 11:56-da (Bakı vaxtı ilə saat 21:56) 7.6 bal gücündə zəlzələ olduğunu açıqlamışdı. Həmin vaxt episentr paytaxtdan 213 km cənub-qərbdə, ocaq isə 12 km dərinlikdə qeydə alınmışdı.