Messinin son oyununa biletlər dörd dəqiqəyə satıldı: Qiymətlər təəccübləndirdi

Argentina millisinin kapitanı Lionel Messinin milli komandada sonuncu oyununa çıxacağı gözlənilir. Bu səbəbdən qarşılaşmaya biletlər satışa çıxarıldıqdan cəmi dörd dəqiqə sonra tükənib. Oxu.Az "Əl-Cəzirə"yə istinadən xəbər verir ki, 39 yaşlı hücumçu oktyabrın 6-da (Bakı vaxtı ilə oktyabrın 7-də) Buenos-Ayresdə Benin millisinə qarşı keçiriləcək yoldaşlıq görüşündə Argentina millisinin heyətində yer alacaq. Argentina Futbol Assosiasiyasının prezidenti Klaudio Tapia bildirib ki, Messinin oyuna dəvət edilməsində məqsəd ona layiq olduğu vida mərasimini təşkil etməkdir. "Dünyanın ən yaxşı oyunçusu, milli komandamızın simvolu və kapitanımız Lionel Andres Messini oktyabrın 6-da Argentinada layiq olduğu vida mərasimini keçirə bilməsi üçün dəvət etmək qərarına gəldik", - deyə Tapia bildirib. Beninlə qarşılaşma 85 min tamaşaçı tutumuna malik "River Pleyt" klubunun "Estadio Monumental" stadionunda keçiriləcək. Tapia 2022-ci il dünya çempionatının qalibi olan Argentina millisinin bütün üzvlərini də oyuna dəvət edib. Onun sözlərinə görə, bu, Messi üçün unudulmaz tədbir olacaq. Rəsmi biletlər "DeporTick" platforması üzərindən satışa çıxarılıb. Kateqoriyalar üzrə qiymətlər belə olub: - Ümumi giriş (ayaqüstü yerlər) - 59-60 dollar; - Yuxarı tribunalardakı yerlər - 119-120 dollar; - Orta və aşağı tribunalardakı yerlər - 210-320 dollar; - 3-10 yaşlı uşaqlar üçün biletlər - təxminən 19 dollar. Messinin milli komandadakı son oyunu olması gözlənilən qarşılaşmaya biletlər satışa çıxarıldıqdan cəmi dörd dəqiqə sonra tamamilə tükənib. Hazırda biletləri yalnız təkrar satış platformalarında, o cümlədən "StubHub"da və qara bazarda tapmaq mümkündür. Messinin Argentina millisinin heyətində 208-ci və sonuncu oyununa çıxacağı gözlənilir. O, 125 qolla komandanın tarixinin ən məhsuldar futbolçusudur. Messi avqust ayında 20 illik beynəlxalq karyerasını başa vurduğunu açıqlayıb. O, Argentina millisinin heyətində 2022-ci ildə dünya çempionu olub, həmçinin 2021 və 2024-cü illərdə Amerika Kubokunu qazanıb. Qeyd edək ki, Messinin milli komandadakı son oyununun məhz Beninə qarşı keçiriləcəyi əvvəlcədən elan edilmişdi.